21-нши февральде РФ Президенти Владимир Путин Украинада ызгы заманларда туьзилген аьллер мен байланыста Россия халкына каратылган шакырувы ман (шакырувдынъ толы текстин 4 – 6-ншы бетлерде окынъыз) шыгып соьйлеген. Сонынъ сырагысында ол сол ок куьн РФ Кавыфсызлык Советининъ йыйынында айткан соьзине берк болып, Луганск эм Донецк Республикаларынынъ бойсынмаслыгын кабыл эткен.
Владимир Путин соьзининъ басында конъысы Украинада болып турган ислер Россия уьшин айлак та маьнели экенин белгилеген. Онынъ соьзи мен, аьлиги замандагы Украина толы кебинде алдынгы Совет Россиядынъ аркасы ман туьзилген. Президент Украинадынъ туьзилуьвининъ тарихи, онынъ патшалыгынынъ маьселелери акында хабарлаган.
– Майдан Украинады демократияга янастырмады, – деген Путин. – Элди терен экономикалык кризис бийлеген. Газ эм коьлик тармаклары бузылган, соларды СССР туьзген. Ярлылык, мадарсызлык, США элдеги суд эм сайлав тармакларына тергевин салган.
Президенттинъ айтувы ман, США Украинады согыс савыты ман толтырувда, сонынъ уьшин «миллиард доллар» акша карыжын шыктажлаган. США ман НАТО «бир де уялмай, Украинадынъ ерлерин кулланувда», биргелес аьскер уьйренуьвлери Россияга карсы каратылган. США-га, неге десе, оьз басына ие эм куватлы Россия керек тувыл. Сол себептен, Украина эгер НАТО-га туьссе, бу ис Россиядынъ кавыфсызлыгына тувра коркынышлык тувдыраягына шек йок. Украина НАТО-га киргендей болса (сол сорав шешилгенге эсап), альянс аьскерлерине Россияга карсы шапкынлык этпеге тувра плацдарм болып кулланылаяк.
Путиннинъ соьзине коьре, Россия оьзининъ суверенитетин эм бойсынмаслыгын таптамага биревге де ыхтыяр бермеек.
Донбасста туьзилген аьллер мен байланыста Президент Украина етекшилери соларды ийгилендируьв акында ойлаган да этпейдилер деп билдирген. Балаларды, картларды, кыскаяклыларды оьлтируьв токтамайды. Сол ок заманда куьнбатар эллери мундай кыянатлыкты коьрмегендей боладылар.
– Соны ман байланыста ДНР эм ЛНР бойсынмаслыгын кабыл этуьв керек деп санайман. Россия яшавшыларына сол затты макул коьрмеге тилек этемен, – деген Путин.
Шакырувдан сонъ РФ Президенти Донецк Халк Республикасы эм Луганск Халк Республикасынынъ бойсынмаслыгын кабыл этуьв акында указларга кол баскан. Путин эм бу айтылган республикалардынъ етекшилери дослык, катнасувлык эм бир-бирине ярдам этуьв акында оьзлери ара келисуьвлер туьзгенлер.
Экинши куьн, 22-нши февральде, РФ Государстволык Думасы эм РФ Федерация Совети Россия Президентининъ ДНР эм ЛНР бойсынмаслыгын кабыл этуьв акында карарлары ман макуллыгын беркиткенлер.
Сол куьн ок РФ Федерация Совети Россия Президентине РФ Савытлы Куьшлерин Донбасстагы аьллер мен байланыста элимиздинъ тысында кулланувга оьз ыхтыярын берген. Сонынъ акында тийисли токтасты сенаторлар парламенттинъ йогары палатасынынъ кезексиз йыйынында бир тавыстан кабыл эткенлер. Соны ман бирге Федерация Совети Россия Президенти мен Советке ойласувга йиберилген ДНР эм ЛНР ман дослык, катнасувлык эм бир-бирине коьмек этуьв акында келисуьвлерди де беркиткенлер.
