Сабантой аьвелгиден алып коьплеген халклардынъ энъ суьйикли байрамларынынъ бириси болып келеди.
Онъайлы истинъ, куваныштынъ, наьсиптинъ байрамына халклардынъ ыспайы аьдетлери, йырлары, ойынлары бирге косылувы ман оны мукаят та шатлыкка толтырып, маьнели этеди. КарашайШеркеш Республикасынынъ Икон-Халк авылында сары тамбыз айынынъ уьш куьни бойында Сабантой байрамы шатлыклы аьлде уйгынланып оьтти. Бу савлайногайлар байрамы КарашайШеркеш Республикасынынъ 100 йыллыгына эм Ногай районынынъ туьзилуьвининъ 15 йыллык мерекесине багысланган эди. Сабантой байрамы Россия ногайларынынъ федераллык миллет маданият автономиясынынъ баславы, солай болып, Россия миллетлерининъ ислери бойынша Федераллык Агентствосынынъ акша ягыннан демевлиги эм Карашай-Шеркеш Республикасындагы Ногай район администрациясынынъ колтыклавы ман оьтти. Айтып озайык, шара Россия ногайларынынъ Федераллык миллет маданият автономиясынынъ Йогары Советининъ председатели, ямагат эм политика аьрекетшиси Валерий Казаковтынъ Карашай-Шеркеш еринде халк аьдетлерин саклав мыратта аьвелги байрамды кайтадан оьрлендируьв, деген ой-маслагаты бойынша яшавга шыгарылды. Байрамда Ногай район администрациясынынъ аькимбасы М.Хапиштов, Карашай-Шеркеш Республикасынынъ Оькимет Председателининъ орынбасары Д.Суюнов, Халк Йыйынынынъ Председателининъ биринши орынбасары Д.Смакуев, Халк Йыйынынынъ депутаты М.Михайлович, Баспа эм коьлем коммуникациялар, миллетлер ислери бойынша министри А.Кумуков, туьрли районлардан, Дагестан, Шешен, Крым Республикаларыннан, Ставрополь крайыннан, Астрахань областиннен делегациялар ортакшылык эттилер. Байрамнынъ барысында район етекшилеви авыл хозяйствосында баскаланган алдышы куллыкшыларды, интеллигенция ваькиллерин, спортсменлерди Сый грамоталар ман белгиледи. Миллет ойынлары, саният усталары катнаскан концерт программасы кирген шарага келген конаклар Икон-Халк авылынынъ стадионында ногай халкына, райондагы аьр бир авылына, оьз оьмирлик мерекесин белгилеген Карашай-Шеркеш Республикасына коьплеген кутлав соьзлерин багысладылар, бийик етимислерди, оьрленуьвди сагындылар. Йыйылганларга миллет азбарлары да курылган эдилер. Онда аьр бир келген конаклар ногай ашханасынынъ туьрли зияпетли асларыннан таттылар. Байрамда йыйылганлардынъ коьнъилин халк биювлери, йырлары, Абазин, Адыге-Хабль, Зеленчук, Хабез районларынынъ усталарынынъ юннен ойылган, агаштан эм темирден этилген туьрли ислерининъ выставкалары, солай болып, спорт ойынлары, айтпага, аркан тирес, колйыгыс, колтас, табантирес, таскоьшер эм юз шакырым ерге ат шабыс базласувлары озгарылувы коьтерди. Келеек йылда «Сабантой» байрамы Россиядынъ ногайлары яшайтаган алты регионларынынъ бирисинде озгарылаяк. Соьйтип, Сабантой – савлайногайлар байрамы йогары коьнъилде озды. Суьвретте: шарадан коьринис.
