«Россети Северный Кавказ-Дагэнерго» ПАО Ногай РЭС энергетиклерининъ куллыкшылары районымыздынъ баьри авылларын электроярыгы ман канагатлав куллыгын шалысып толтырадылар. Олардынъ ийги иси республика энергетика тармагынынъ етекшилери мен де белгиленеди.

Янъыларда «Россети Северный Кавказ-Дагэнерго» ПАО Ногай РЭС энергетиклерининъ куллыкшыларына ийги ис сырагылары уьшин разылык эсабында автокоьликлердинъ ашкышлары тапшырылды. Белгиленген шарада «Ногайский район» МР администрациясынынъ аькимбасы М.Аджеков ортакшылык этти. Район аькимбасы район энергетиклерине оьзининъ эм район яшавшыларынынъ атыннан, ислерин намыслы толтырганы уьшин, разылыгын билдирди. Ол янъыларда куьшли еллер эскен куьнлерде республикамыздынъ бас каласы Махачкалада 3-4 куьн узагында электроярыгы болмаган болса, Терекли-Мектеб авылында район энергетиклерининъ куьш салувы аркасы ман электроярык пан канагатлав ягыннан коьп иркилуьвлер болмаганын да айтты. Шарада Ногай РЭС начальниги Рамиль Муслимов етекшилеген коллективининъ тыпаклыгын белгиледи.
Бу куьн Ногай РЭС бас инженери Камиль Буланбаевке, Карагас авыл тармак участогына бирер «Лада-Гранта», Червленные Буруны авыл участогына «УАЗ» коьликлери тапшырылды. Муннан алдын да ПАО «Россети» Ногай РЭС-на специальли техника айырган. Уьстимиздеги 2020-ншы йылдынъ басында Ногай РЭС коллективине автогидроподъемник берилген, август айында Дагестан Республикасынынъ Оькиметининъ председателининъ орынбасары Владимир Лемешко эм «Россети Северный Кавказ» – Дагэнерго филиалынынъ етекшиси Андрей Меделянов Рамиль Муслимовка техника тапшырганлар.
Н.Кожаева.
Суьвретте: автокоьликти тапшырув мезгили.