Дагестан Республикасы бойынша оьткерилген тергевлерге коьре, 42 муниципаллык районлары ишинде Ногай районымыз савгалы уьшинши орынга тийисли болган.

2015-нши йылдынъ курал айынынъ 8-нши куьнинде шыккан Дагестан Республикасынынъ Аькимбасынынъ «О внедрении в Республике Дагестан Стандарта развития конкуренции в субъектах Российской Федерации» деген 96-ншы номерли Указына коьре ис аьрекет юритиледи. Бу йогарыда айтылатаган оьрленуьв уьшин юритилетаган базлас стандарты бюджет амалламалары аркалы акшалай косым аькеледи. Сол келим болса, экономикадынъ айырым секторынынъ оьрленуьвине, оьсуьвине себеплик этеди.
«Ногайский район» МР администрациясында оьрлендируьв уьшин юритилетаган базлас стандарты уьшин экономика эм уйгынлы-проектли оьрленуьв боьлиги яваплы болады. Боьлик куллыкшылары ман муниципаллык районымыз бойынша толтырылатаган буйымлар, савда тармагында тийисли стандартты коьтерер уьшин этилинетаган куллыклардынъ дайымлык мониторингин тергеп турадылар. Сол ниет пен потребительлер эм предпринимательлер араларында анкетирование оьткериледи. Сол тергевлердинъ тамамлары тийисли органларга тергевге эм ой-токтаска келмеге йибериледи.
Ногай районымыз бойынша оьрленуьв уьшин юритилетаган базлас стандарты акында толы билдируьвлер «Ногайский район» МР администрациясынынъ байыр сайтында ерлестириледи. Боьликтинъ этилетаган куллыклары баьри де Дагестан Республикасынынъ экономика эм территориаллык оьрленуьв министерствосы ман тергелип турады, эм сол тергелуьвлер аркалы аьр бир районнынъ онъайлы инвестиционлык авасын белгиленеди.
Буьгуьн бизим «Ногайский район» МР администрациясындагы экономика эм уйгынлы-проектли боьлиги, ийги сырагыларды коьрсетип, етимиске етискен. Бу боьликти коьп йыллардан бери Равзият Махмат-Мурзаевна Сеитова етекшилеп келеди, оны ман бирге бу боьликте ис аьрекетин бардырып келеди Сталинат Союновна Сагиндикова. Сулыплы куллыкшылардынъ ызын ызлап мунда Зарина Суюнбековна Курганова ман Альфира Арсланбиевна Бекмурзаева барадылар. Яс специалистлер оьзлерининъ сулыплы йолдасларыннан коьп затларга уьйренмеге шалысадылар.
Буьгуьнги етимис – олардынъ ортак ислерининъ тамамы. Биз «Ногайский район» МР администрациясынынъ экономика эм уйгынлы-проектли оьрленуьв боьлигининъ куллыкшыларын алган савгасы ман кутлаймыз эм алдыда соннан да уьйкен етимислерге етискенди йораймыз.
Г.Сагиндикова.
Суьвретте: Р.Сеитова.