Аьлиги сары тамбыз айдынъ куьнлеринде савлай дуныядынъ эси Токио каласына каратылган. Мунда шынтылай да исси – XXXII Олимпиада ойынларында 200 эллерден 11 мынъга ювык спортсменлер катнасадылар.
Альберт Батыргазиев! Бу атты савлай россиянлылар, дагестанлылар эм, кашан да, ногайлар айтып турадылар. Бокс бойынша 4 кере Россия чемпионы, ногай миллетли яс – шеккиси 57 килограмм категориясында олимпиададынъ алтын медалин алмага болатаганлардынъ бириси. Спортсменге ол биринши уьйкен сынав болады. 1/8 финалда Альберт Батыргазиев Доминикан Республикасыннан Алекси ла Круз бан сынасты, ¼ финалда ол Монголия спортсмени Цендбаата Эрдэнэбатты енъди. Полуфиналда Альберт куьшли спортсмен кубиншы Ласаро Альварес пен куьрести. Альварес – уьш кере дуныя чемпионы, Лондон эм Рио-де-Жанейро калаларында Олимпиада ойынларында ез медальлерин алган. Токио каласына ол алтын медаль алмага келген, болса да полуфиналда россия спортсменин енъип болмады.
– Енъуьв сынасларга дейим алынады. Мен ойлайман, мен енъуьвге аьзир. Бираз кишкей калды – финал. Сол затты ыспатлав керек, – деп айтты Альберт куьресуьвден сонъ.
– Финалда кыйын болар ма?
– Финалда осал спортсменлер болмас, кыйын болар, кашан да. Ызгы куьреске биз ийги этип аьзирленемиз. Ушынын айтсам, мен финалда узбек боксер Миразизбек Мирзахалилов пан куьресермен деп ойлаган эдим. Бакты баскалай онълады.
Альберт Батыргазиев 5-нши августта финалда американ спортсмени Раган Дьюком ман сынасаяк. Полуфиналда Альберт куьреске ногай йыравшы Асланбек Султанбековтынъ (Асау) «Домбыра» йыры ман шыкты.
– Бу йыр меним ювык аьдемим Асаудынъ йыры. Ол кайтип ийги этип ойнайды домбырада, аьдемнинъ юрегине тиеди. Бу йыр ногай тилинде, мен – оьзим де ногай. Куьресуьв алдында бу йыр меним эркимди, коьнъилимди коьтереди.
Биз Арсланбек Султанбеков пан ватсап бойынша соьйледик, аьлиги заманда ол Турция элинде яшайды.
– Альберттинъ оьзденлиги, куьрес заманында онынъ йигерлиги мени сукландырады. Мен он кере карадым онынъ куьресуьвлерин. Мен яратувшылыктан бос заманда дуныя боксерларынынъ куьреслерин карайман, солардынъ ишинде – Альберт Батыргазиев. Ызгы куьресте ол оьзининъ эркли касиетин коьрсетти. Альберт аьдемшилиги айлак уьйкен аьдем. Савлай туьрк эм мусылманлар дуныясы куьрес мезгилинде Альберттинъ киели окувларды окыганына сукландылар.
Мен ак юректен спортсменнинъ ата-анасына сондай увыл оьстиргенине савбол айтаман. Альберттинъ айтувы ман, олардынъ аьелинде 6 кеде тербияланады, мен оларга агаларындай йигерли болып оьскенин йорайман. Альберттинъ тренерлерине де разылыгымды билдиремен.
Альберт куьреске «Домбыра» йыры ман шыгаман деп айтты. Меним йырым ога коьмек эткенине бек суьйинемен. Эгер домбырадынъ сеси ога куьш беретаган болса, биз шекленмей айтпага боламыз – Альберт бизим бурынъгы ногай халкымыздынъ ваькили, онынъ каны. Мен Альберттинъ енъгенин коьргенде, коьзясымды алдым эм ойладым, бизим халкымыздынъ шынты патриотлары Зинаида Коштакова, Кадрия, Сраждин Батыров коьрген болса экен. Биревлер айтадылар, бизим халкымызда бирлик йок деп. Мен айтпага суьемен, халкы уьшин яшайтаган эм ислейтаган инсанларга бирлик, оьз халкына айырым суьйим бар. XXI оьмирдинъ патриотларынынъ сырасына бизим спортсменлер Альберт Батыргазиев эм Юсуп Батырмурзаев кирдилер. Биз оьктемлик пен айтпага боламыз – ногай халкынынъ белгили инсанлары Альберт эм Юсуп.
Мага Германиядан бизим ногай Фатин Полат тел согып, савлай дуныя ногайлары Альберт уьшин кыйланадылар, ога енъуьв йорайдылар деп айтты. Мен бизим ясларга енъуьв эм тек енъуьв йорайман. Мен оларга оьз насихатымды айтпага суьемен: «Оьз куьшинъизди, усталыгынъызды коьрсетпеге заман келди. Сиз куьресуьвшилер. Сиз экевинъиз де сынавлар заманында болган оьзгерислерден йигерлик пен оьтпеге керексиз.Сиз куьндеслерге карсы турмага керексиз. Сизди бир зат та сындырмас! Сиз бизим ата-бабаларымыздай болып, куьреспеге керексиз.
Альберт, алдыга! Юсуп, алдыга! Тек алдыга! Савлай дуныя ногайлары буьгуьн сизи мен!» – деп айтты йыравшы.
Эльмира Кожаева,
«Шоьл тавысы» республикалык газетасынынъ бас редакторы.
