Уьйсалган авылынынъ мектебининъ ана тил эм адабиат окытувшысы Рамина Алимхановна Байрамова аьли де яс болса да, окытувшылык тармагынынъ сулыбын алып келеятыр. Ол Хасавюрт педагогикалык колледжин битирип, 5 йыл узагында ислейди.
– Яс окытувшы оьз исинде аьлиги заманга келисли билимлендируьв технологияларын кулланады, дерислери кызыклы болып оьтедилер, балалар ымтыладылар билимге, ашыладылар, яратувшылык оьнерлерин куьшлендиредилер. Оьз билимин оьстируьв ниет пен Рамина Алимхановна окув китаплер, соьзликлер, энциклопедиялар, газеталар, журналлар кулланады, сол билимди дерислерде эм класстан тыс шараларда окувшыларга коьширеди. Ол «Окувшылардынъ лингвистикалык билимин кеплев амаллары этип ана тил эм адабиат дерислерде окувдынъ активли йосыкларын кулланув» деген тема бойынша ислейди эм сол йосыкларды кулланып, балалардынъ да билимин оьстиреди, – деп айтады окытувшы акында мектеб директоры Зульфия Магомедалиевна Кожаева.
Окытувшы оьзининъ бир кесегин балаларга бермеге керек. Сондай шакырув астында куллык этеди Рамина Байрамова.
– Окытувшы – ол аьр заман излев, романтика. Олар менде аьр бириси туьрли эм бирдей боладылар – ланъкалы, уьндемес, ойшанъ. Олар коьп затларды билмеге суьедилер, «неге?» деген соравга явап кайтарып, бир-бирде арып каласынъ. Мен балаларга аьр заман айтаман, келеекте де билим алынъыз, билимли аьдем – кайзаманда да сыйлы эм абырайлы. 45 такыйка дерис беруьв уьшин окытувшы коьп окымага, билмеге керек. Мен дерислерде окувшыларым ман бирге билимнинъ ийги деген йосыкларын, кеплерин излеймен, эрисуьвлер де болады, соьйтип биз оьзимиз де коьп затларга уьйренемиз. Мен оьзимнен сорайман: «Сен наьсипли ме?». Кашан да, наьсипли, неге десе мен оьз кеспимди суьемен, – деп хабарлайды оьз кесписи, окувшылары акында яс хатын.
«Олар менде» деп айтады окувшылары акында Рамина Алимхановна. Сол заманда анълайсынъ, оьзиндики болып калган балаларды ол суьеди эм анълайды. Сол тувыл ма окытувшыдынъ энъ де биринши борышы – балаларга суьйим бермеге.
Мен тувган Уьйсалган авылынынъ окытувшыларын кеспи байрам ман кутлайман, сондай ярасык, сыйлы эм кыйынлы исинде коьп уьстинликлер сагынаман.
Г.Бекмуратова.
Суьвретте: Р.Байрамовага Сый грамотасын тапшырув мезгили.
