Кизляр район администрациясында район аькимбасынынъ орынбасары Иса Рамазановтынъ етекшилиги астында эм Дагестан Республикасынынъ Халк Йыйынынынъ депутаты Вагиф Абдуллаевтинъ катнасувы ман Антитеррористлик комиссиясынынъ йыйыны уйгынланып оьтти.

Йыйында Кизляр районынынъ АТК агзалары, ыхтыяр саклав органларынынъ ваькиллери, Кизляр районы бойынша Россия УФСБ, авыл аькимбаслары, район администрациясынынъ тармак боьликлерининъ етекшилери, депутатлар ортакшылык эттилер. Йыйында доьрт сорав ортага салынып ойласылды эм айырым ясы етпеген балалардынъ эм законга карсы савытланув туьркимининъ катнасувшыларынынъ аьеллери арасында алдын шалув ислерин уйгынлав, баска болып, тутнактан босатылганлар арасында терроризм идеологиясы яйылувынынъ алдын шалув бойынша алынатаган амаллар акында айтылды. Билимлендируьв Управлениесининъ косымша билимлендируьв эм тербиялав иси бойынша боьлигининъ етекшиси Абдул Раджабов эм ясы етпегенлердинъ иси эм олардынъ ыхтыярын коршалав бойынша комиссиясынынъ яваплы секретари Мадина Блинова оьз докладларында ясы етпегенлерге медициналык, социаллык, психологиялык, ыхтыярлык ярдамларын куьшейтуьви эм законга карсы савытланув туьркимлери агзаларынынъ толы кепте эсапка алынувы акында хабарладылар. Баска болып, йыйында террористлик эм экстремистлик кыянатлыкларын эткен Кизляр районынынъ уголовлык толтырув инспекциясында эсапта болган доьрт яшавшыларын белгиледилер. Дембиди толтырув бойынша федераллык службасынынъ муниципаллык ара Кизляр филиалынынъ етекшиси Зиятхан Керимовтынъ соьзи мен, сол белгиленген аьдемлер мен суд пан каралган тыйдажылык тутылатаганы дайым тергеледи эм оларды тынышлы яшав аьллерине аькелуьв бойынша куллыклар юритиледи.
Солай болып, Кизляр районы бойынша Россия ОМВД-нынъ етекшиси Амирбег Джабраилов 2021-нши йыл бойынша гражданлардынъ оьз ыхтыяры ман савыт-садакты, атылув алатларын кайтарылувлары бойынша ис тамамларын белгиледи. «Оружие – выкуп» деген алдын шалув операциясы бойынша олар законга карсы сакланган савыт-садакларын кайтарсалар, уголовлык яваплыгыннан босатылатаганын айтты.
Баска болып, Дагестан Республикасынынъ Халк Йыйынынынъ депутаты Вагиф Абдуллаев террористлердинъ колларыннан ян берген ыхтыярды саклав органларынынъ куллыкшылары эстелигине патриотлык акцияларынынъ белсенли юритилуьвин де белгиледи.
Иса Рамазанов, Антитеррористлик комиссия йыйынынынъ тамамын келтире келип, белсенли ортакшылык эткен катнасувшыларга уьйкен разылыгын билдирди эм буьгуьнлерде де терроризм эм экстремизмнинъ алдын шалув энъ маьнели борыш болып калатаганын айырым белгиледи.
Суьвретте: шарадан коьринис.