Уьстимиздеги йылдынъ кырк кийик айынынъ19-ншы куьнинде – Россия Федерациясында ортак сайлавлар куьнинде туьрли дережели орынларга сайлавлар озгарылаяклар. Сонынъ ишинде – Государстволык Думасына депутатларды, Россия Федерациясынынъ онавдан артык субъектлеринде аькимбаслар эм кыркка ювык ерлерде эм патшалык властьтинъ законодательный органларына депутатларды сайлавлар.

Сол куьнди рахатлыкта озгарар уьшин саклык тутпага керек болады. Сайлавларга аьзирлик коьрилетаган, озатаган шакларда, сайлавлардынъ озганын суьймейтаган аьдемлер кайтип те буршав бермеге шалысадылар. Сондай тийиссизликлер мен йолыкпаяк болсак, белгиленген шартларды толтырмага керек болады. Сайлавлар – аьдем яшавында маьнели оьзгерислердинъ бириси. Бизим сайлавымыздан районымыздынъ ямагат политикалык эм криминогенли аьллердинъ кайдай болаягы ман байланыслы. 2021-нши йылдынъ кырк кийик айынынъ 19- ншы куьнинде озгарылаяк сайлавларга аьзирленуьв ишинде Ногай районы бойынша Россия МВД боьлигининъ куллыкшылары да айырым шаралар озгарадылар. Олардынъ бас борышлары – ямагат арасында кавыфсызлыкты канагатлав.
Аьли уьшин Ногай районы бойынша Россия МВД боьлигине, сайлавларды озгарувга буршавлык этуьв ниет пен озгарылмага болатаган ислер акында туьсетаган билдируьвлерге коьре, район яшавшыларына уьйкен тилек, сак болып юринъиз, таныс болмаган аьдемлерге мукаят каранъыз, ят автокоьликлердинъ номерлерин язып алынъыз. Каравсыз яткан дорбаларга, оравлы затларга оьзинъиз янаспанъыз, тийисли органларга билдиринъиз, сол ерлерде мобильли телефонлар ман да пайдаланманъыз. Солай ок оьзинъиз де террористлик ислер акында бир затлар эсите калсанъыз, кешиктирмей, Ногай районы бойынша Россия МВД боьлигине 8-872-56-21-4- 78 яде 02 сеним телефонына тел согынъыз.
И. Янполов,
Ногай районы бойынша Россия МВД боьлигининъ начальнигининъ исин толтырувшы полиция подполковниги.