Муннан коьп йыллар артта, Анвар аьли де тогыз ясына толып-толмай, атасы Шора Абдулмежит увылы оны Терекли-Мектебтеги музыкалык мектебининъ баян классына аькеледи. «Ийги этип окысанъ, мен сага велосипед аларман», – дейди атасы увылын музыка дуныясы ман кызыксындырмага суьйип. Соны ман А.Джанибеков атындагы орта мектебинде шалысып окыйтаган Анвар Аджибаев мунда да илгери ымтылып билим алып баслайды. Соьйтип музыкадынъ аьйлели, аьдем коьнъилин кенъейткен ыспайы эли онынъ янын бийлеп алып, коьтерип коькке ушыртты десем ялган болмас. Ол музыкалык мектебинде энъ де ийги окувшылар санына кирип кетти. Атасы, элбетте, берген соьзине берк болды: увылына яп-янъы велосипед алды. Сол йылларда балалар уьшин велосипед автомашинага тенъ эди. Велосипединъ бар болса язда пляжга, ювык коьллерге балык ысламага, табиатка кыдырып шыкпага боласынъ.
Анвар Аджибаев музыкадан йылдан-йылга билимин эм сулыбын арттырып барды. Окытувшысы – ДАССР ат казанган маданият куллыкшысы, айтылган ногай композиторы Мурзадин Ибрагим увылы Османов (Алла ога тынышлык берсин) оьз окувшысында ийги талап барлыгын билип, онынъ оьнер усталыгын, билимин теренлетпеге шалыскан.
Анвар 1988-нши йылда музыкалык мектебти кутарады эм 9-ншы класстан сонъ Махачкаладагы Г.Гасанов атындагы музыкалык училищесине окувга туьседи. Мунда ол эндигиси Анатолий Борисович Матюхиннинъ классында билимин оьстиреди.
– Училище аьдемге оьзинъде бар болган талабынъды оьнерге айландырмага, оьнеринъди оьрлентпеге амал береди. Сонъында ол зат мага консерваторияда окыган йылларымда берк тирев эм сенимли коьпир болды, – деп эскереди училищеде окыган йылларын Анвар Шора увылы.
Училищеде окыятып, Анвар Аджибаев эки кере 1989 эм 1991-нши йылларда Тоьмен Поволжье эм Сырт Кавказ халк саз алатларында ойнавшылардынъ зоналык конкурсында катнаскан эм эки кере де 3-нши баргылы орынларды казанган.
1992-1997-нши йылларда ол билим йолында тагы да бир басамакка минмеге эп тапты демеге керек. Бу йол А.Аджибаев Астраханьдеги патшалык консерваториясына туьсип, соны окып битиреди. Мунда да ол баян бойынша окытувшы Владимир Антонович Балыктынъ классында окыйды. Соьйтип Анвар музыкалык билимин эм оьнерин оьстирип, тап 15 йылга созылган узын йолды оьткен. Айтып озув керек, соьйтип шыдамлы эм арзекер кепте ким болса сол окып болмайды. Анвар окыды эм тувган Ногай шоьллигине аты айтылган йогары квалификациялы, уьйкен бес сыдыралы баянда занъыратып ойнайтаган музыкант-виртуоз, билимли дирижер болып кайтты.
1997-нши йылда Анвар Шора увылын район орталыгындагы саниятлар мектебине окытувшы эм патшалык ногай халк саз алатлар оркестрине дирижер этип беркитедилер. 2001-нши йылдан алып ол бу мектебти муннан алдын басшылаган айтувлы музыкант, оьнерли ногай композиторы, сонъында халкымыздынъ саз алатлар оркестрининъ етекшиси, Дагестан эм Россия ат казанган маданият куллыкшысы Яхья Кудайбердиевтинъ орынына келеди. Айтып озув керек, бу ягыннан Яхья Таймасхан увылы яс Анварга етекши куллыгына коьшуьвде эм ис сулыбын алувда тийисли коьмегин эткен.
Соьйтип Анвар Шора увылы Сраждин Батыров атындагы саниятлар мектебин 20 йылдан артык заман басшылап келеди. Сол шаклы йыллар ишинде мектеб халкымыздынъ коьп яс оьнерлерин билимлендирген эм тербиялаган, хыйлы ясларды район, республика эм элимиз бойынша оьнер уьстинликлерине етистирген. Коьп соьзли болмас уьшин тек ызгы бир йылдынъ бир-эки ис сырагыларын алып карайык.
2022-нши йылда «Виват, культура-2022» деген 3-нши Савлайроссиялык заочный яратувшылык конкурсынынъ 2-нши дережели лауреаты Карим Куруптурсунов болган (окытувшысы Р.Акболатов).
«Россия сеними» деп аталган 7-нши Халклар ара конкурсында Медина Менглиязова, Элина Курганова 1-нши дережели лауреатлар, Ислам Джумагишиев 2-нши дережели лауреат (окытувшысы Б.Коккезова) атларын казанганлар.
Сол йыл Санкт-Петербург каласында «Асабалык маьлиеклери» деген Халклар ара саваплык фестиваль-конкурсында Алтынай Муталлапова (окытувшысы К.Межитова) эм Айгуль Эдильбаева (окытувшысы Э.Толубаева) катнасканлар эм 2-нши дережели лауреат атын байырлаганлар. Мунда билим алган эм алатаган оьнерли эм талаплы балалар сырасын эндиги де созбага болады, олар сондай да бек коьп!
Аьдем оьмири йылысып барган йылгадай: сени аьли де бала заманынъда коьрген сув кесеги эндигиси кайдай эрекке агып кеткен. Соьйтип бизим яшавымыз анамыздан тувганнан ок бир еринде турмай балалыктан – яслыкка, яслыктан – эсли шакка коьшеди. Янъыларда Анвар Аджибаевке тувганлы 50 йыл толды. Сол шаклы оьмир оьрисининъ 40 йылы музыкадынъ аьдем коьнъилине рагимлик беретаган дуныясына, 20-дан артыгы халкымыздынъ яс несиллерин оьнер усталыгына окытувга эм тербиялавга берилген. Ис етимислери уьшин 2017-нши йылда ол ДР ат казанган маданият куллыкшысы деген сыйлы ат пан савгаланган. Бир неше кере ДР Маданият министерствосыннан, бир кере ДР Оькиметиннен Сый грамоталарын алган.
Биз «Шоьл тавысы» республикалык газетамыздынъ атыннан Анвар Шора увылын оьрметли мерекеси мен кутлаймыз, ога берк ден савлыкты, узак оьмирди эм тенъиз толкынларындай таркамас оьнер кайратлыкты йораймыз!
М.Ханов.
Суьвретте: Анвар Аджибаев.