Халклар ара хатын-кызлар куьни алдында Ногай районынынъ аькимбасы Мухтарбий Кошманбет увылы Аджеков район Хатын-кызлар советининъ етекшиси Асият Манкаева ман бирге район орталык больницасынынъ бала табув боьлигине бардылар, «Тувган куьнинъ мен, саьбий» деген акцияда катнастылар.

Бала табув боьлигинде ра йон басшысы коьп балалы хатын Эльвира Кульчимаевады аьелде уьшинши кыз тувганы ман кутлады, ол анага да, саьбийге де ден савлык, аьелде онъайлык йорады. Мухтарбий Кошманбет увылы районга коьп балалы аьеллер керек деп айтты.
– Аьр бир баладынъ тувганы – суьйиниш, балалар – бизим келеектегимиз, аьелде уьшинши бала тувса, администрация ман белгиленеек, – деп айтты район аькимбасы. Солай ок Мухтарбий Аджеков боьлик куллыкшыларын да кутлады, оларга исинде коьп уьстинликлер йорады. Оларга балалар табув боьлигининъ боьлмелери бир де босамасын деп айтты. Сонъында район басшысы Тезлик ярдам бригадасы ман йолыкты.
– Мен айырым кепте бизим районымыздынъ медицина куллыкшыларынынъ кайратлы исин белгилемеге суьемен, оларга уьйкен савбол айтаман. Озган йыл кыйынлы эди, сиз баьри кыйынлыкларды да оьтпеге куьш те, сулып та таптынъыз, яман маразды енъуьв уьшин яшавларынъызды да аямадынъыз. Сизге берк ден савлык, баьри ийгиликлер йораймыз, – деп ол больница куллыкшыларын кутлады. Оьз йоравларын Ногай районынынъ Хатын-кызлар советининъ председатели Асият Манкаева да айтты.