Балалыктынъ байрамы – ол яркын, ярасык эм мутылмас.
Балаларды коршалав куьниннен алдын Кумлы авылында балалар уьшин байрам озды.

Кумлы авылынынъ аькимбасы Сакинат Елманбетова байрам шаралар озгарар уьшин аниматорларды шакырды.
– Буьгуьн биз Кумлы авылынынъ кишкей яшавшыларына таза аспан астында байрам савкатладык. Балалар эртеги баьтирлери Бубады, Зайкады, Дональдты эм Дакты коьрип бек суьйиндилер. Саьбийлер оларды коллары ман ыслап, кушагына кыспага суьйдилер. Олардынъ коьзлери йылтырап, ишинде таьвесилмес наьсип эм суьйиниш сезилди. Балалар оьзлерин шынты эртегидинъ ишине киргендей этип сездилер. Олардынъ занъыраган куьлкиси эм суьйиниши уьшин куьш салган аьр бир аьдем наьсипли. Солай ок мороженое, сок эм баска таьтли зияпетлер мен байрам боьтен де завыклы болды, – деп хабарлайды ол.
Кумлы авылынынъ аькимбасы йыл сайын балалар уьшин байрам озгармага ниетленди.
Балалардынъ байрамы Терекли-Мектеб авылында да бек кызыклы эм уйгынлы оьтти. Авыл балалары паркка шыгып, коьнъил коьтерилис аьлде куьнин озгардылар. Олар уьшин аниматорлар шакырылдылар, «Айланай» фольклор-этнографиялык ансамблининъ куллыкшыларынынъ куьш салувлары ман туьрли ойынлар, конкурслар озгарылды. Солай ок балалар бавларында аьр бир балага таьтли зияпетлер пайланды. Бу куьнги байрам районымыздынъ кишкей яшавшыларынынъ эсинде коьпке сакланар.