Янъы тувган саьбийди карамага кыйынлы деп ойлайман, йыласа, ол оьзининъ кайсы ери авырыйтаганын да айтып болмайды. Сога коьре, бала табув уьйден шыккан балады патронажлы сестра келип карайды, ол – кеспили медициналык сестра, ийги этип акушерстводы эм алдын шалув медицинады биледи. Онынъ борышлары – анадынъ эм янъы тувган баладынъ ден савлыгын тергев, ата-аналарды балады кайтип карамага керек деп уьйретуьв. Баладынъ ден савлыгында кемшиликлер бар болса, патронажлы сестра биринши болып биледи эм анасына айтады. Патронажлы сестра – яс аналарга эм аталарга коьмек этетаган ийги маьлиек.

Хаирниса Шомар кызы Нурлыбаева Куьнбатар авылында уьйкен татым аьелде оьскен, атасы дуныядан эрте кешип кетти, балалар уьйилип бир анага карап калдылар. Сол йылларда аьели кайдай кыйын аьллерде яшаганын, Хаирнисадан уьйкенлери окымага амал таппаганы акында хатын мунълы хабарлайды. Уьйкен аданасы уьйли болып, кыз окувды биткенде, мен сени окытарман деп Астрахань каласына педагогикалык институтына туьсирмеге ниетленеди, болса да, бакты ога сол калада медучилищеге туьспеге буйырады. Соьйтип, Хаирниса 1980-нши йыл Астрахань медучилищесине туьседи. Куьндиз кала больницасынынъ балалар инфекционлык боьлигинде санитарка болып ислейди, кешесинде кызалак окыйды.
Аьлиги заманда Хаирниса Шомар кызы Куьнбатар авылында балалар карайтаган патронажлы сестра болып ислейди. Аьрекетин баслаган заманда, Ногай район райпедиатры болып Асрет Сарсей кызы Абдурахманова ислейтаган эди, сонъында Марина Ахмат кызы Арсланова ман иследи Хаирниса Нурлыбаева. Аьлиги заманда ол райпедиатр Альфира Якуб кызы Абдулкеримова етекшилеви астында ислейди.
– Ислейтаган заманы ишинде Хаирниса Шомар кызы оьзин ийги куллыкшы этип коьрсетеди, яшавшылар эм ис коллективи арасында сый-абырай казанган. Авырувлыларга ол ийгилик пен карайды. Озган йыл Хаирниса Нурлыбаева оьз кеспи усталыгын оьстируьв ниет пен «Балаларга биринши медико-санитарлык коьмек этуьв» программасы бойынша сертификационлык курсларды оьтти. Бажарымлы куллыкшы оьз исине алал деп айтпага боламыз, ол – йогары категориялы медсестра, ДР ден савлык саклав министерствосынынъ, Ногай район больницасынынъ етекшилеви атыннан Сый грамоталарга тийисли болган, – деп хабарлайды Хаирниса Шомар кызы акында Ногай ЦРБ бас врачы Фаризат Янибек кызы Межитова.
Куьнбатар авылында врач йок болганга коьре, Хаирниса Нурлыбаева шакырса, кеше-куьндиз балаларга барады. Ол оьз исининъ басы саьбийлердинъ ден савлыгын тергев эм саклав деп санайды. Озган йыллардынъ артыннан карап, хатын арыган куьнлерин де, балады аьжелдинъ яман колларыннан алып калган куьнлерине суьйингенин де эсине алады. Аьелинде де наьсипли ана эм эней болып, ян косагы Сабан-Али Нурлыбаев пен 4 кызды оьстирип, буьгуьнлерде 10 йиенлерине куьезленип яшайды Хаирниса-абамыз. Кеспи байрамды быйыл да куллыкта карсы алаягына шекленмеймиз, неге десе оьз куллыгын ол яшавынынъ басына салады. Хатынды кеспи байрамы ман кутлап, исинде ога уьстинликлер йораймыз, саьбийлер оны завыклы куьлкиси мен карсы алганын сагынамыз.
Г.Абдулакимова.
Суьвретте: Х.Нурлыбаева.