«Шоьл тавысы» газетамыздынъ бетлеринде, элимиздинь туьрли муьйислеринде баска миллетлер мен бир сырада етимисли аьрекет этип, оьзлерин тек ийги ягыннан коьрсетип келген ясларымыздынъ акында йыйы язып келемиз. Буьгуьнги меним хабарым да – ногай шоьлинде тувып оьскен эм мине коьп йыллар бойы Ханты-Мансийск автоном округы бойынша Сургут каласындагы балалар бавында педагогикалык исин уьстинликли юритип келген Альмира Койлыбаева акында.
Альмира Ногай районынынъ Куьнбатар авылында буьгуьнлерде тыншаювда болган тарих дерисиннен окытувшысы Алимсолтан Алимжанович эм биология, химия дерислериннен окытувшысы Юмабийке Бейтуллаевна Джумаевлердинъ окытувшы аьелинде тувган. Белки кыздынъ окытувшы кесписин сайлавына да ата-анасынынь окытувшылар болувы, солай болып, класс етекшиси Рабият Кожахметовна Муллаевадынъ исине яны ман берилуьви себеп болган да болар. Авыл мектебин тамамлаган сонъ, 1992-нши йыл Альмирады сол уьйкен мырады Карашай-Шеркеш педагогикалык институтынынъ филологиялык боьлигине аькелди. Йогары окув ошагын етимисли тамамлап, кыз кесписи бойынша Ногай районынынъ Червленные Буруны авыл мектебинде куллык этип баслайды. Ол мектебтинъ уьйкен классларында орыс тил эм адабиатын окытып эм класс етекшилеп баслайды. Сол йыл ол Червленные Буруны авылынынъ ясы Тахир Койлыбаев пен танысады. Эки ястынъ арасында суьйим сезими тувып, яслар аьел курадылар.
2003-нши йылда яс аьел яшав аьллерин ийгилендируьв ниетте алыс Сургут каласына йол алады. Педагогикалык исинде аз сулыбы болмаган Альмира Алимсолтановнады «Золотой ключик» деген балалар бавында тербиялавшы этип аладылар. Оннан сонъ Альмира 2012- нши йылда «Крепыш» деген балалар бавына коьшеди. Сол заманнан алып Альмира Алимсолтановна алты выпусклерин йолга салды. Онынъ колында тербияланган саьбийлер, балалар бавыннан сонъ гимназияда, прогимназияда, лицейларда окувын бардырадылар.
Альмира Алимсолтановнадынъ коьплеген тербияланувшылары кала, округ, халклар ара, Россия бойынша ярысларда йыйы ортакшылык этип келедилер. Айтпага, саьбийлердинъ юрегине сокпак тапкан куллыкшыдынъ тербияланувшылары биринши каналында оьтетаган «Голос. Дети» деген вокал-телевизионлык шоудынъ, баска болып, ментальлик арифметика бойынша халклар ара ярысынынъ катнасувшысы болганлар.
Буьгуьнлерде биринши категориялы тербиялавшы Сургут каласы бойынша Билимлендируьв департаменти, «Крепыш» балалар бавынынь етекшилеви, ата-аналар комитети атыннан коьпйыллык яваплы куллыгы эм йогары кеспили иси уьшин коьплеген Сый грамоталарынынъ, Разылык хатларынынъ иеси болады. Оьз алдында билимлендируьв иси бойынша оьтетаган халклар ара ярысларында да сулыплы педагог коьп кере ортакшылык этип, еньуьвши болып келеди.
Альмира исин яны ман суьйген куллыкшы болып калмай, наьсипли, суьйикли ана да болады. Альмира ман Тахирдинъ доьрт сылув кызлары, айтпага, Альбина, Алина, Сабина эм Аиша эм эки йиенлери Ибрагим эм Радима яшав куьезлерин арттырып келедилер. Уьйкен кызлары Альбина ногай яс Янали мен татым аьел курып яшайдылар. Алина – Сургут университетининъ медициналык боьлигининъ 6-ншы курсынынъ студенти, Сабина эм Аиша мектебтинъ етимисли окувшылары боладылар. Оларга юрегиндеги суьйимин аямай савгалап келген аналары дайым яшавында коьрим эм уьлги болып келеди.
Альмирага суьйген куллыгында келеекте аьли де бийик етимислерди, ойлаган мыратлары яшавга айланганын, коьп ийги тербияланувшыларды сагынаман.
Г.Нурдинова.
Суьвретте: Альмира Койлыбаева.
