«Юлдыз» балалар бавына барган аьдем Улыбийке Авсей кызы Акбиевады дайым саьбийлердинъ тоьгерегинде, ога коьзлеринде кызыксынув ушкыны ман караган тербияланувшыларды коьрип, олардынъ арасындагы терен байланысы барын сезбей болмаяк. Ол оьз тербиялавшы исине яны ман берилуьвине, саьбийлердинъ юрегине билим сокпагын салып келуьвине, оларды куьн сайын дуныядагы янъы затлар ман таныстырып, билим ашкышын ыслатып келген уста кеспи иеси болганына 37 йыллар болады.
Ол 1965-нши йылдынъ сары тамбыз айынынъ 23-нши куьнинде Сулу-Тоьбе авылында коьпбалалы Авсей эм Марие Акбиевлердинъ аьелинде тунъгыш аьвлет болып тувган. Терекли-Мектеб авыл А.Джанибеков атындагы орта мектебин тамамлап, кыз Астрахань каласындагы тигуьв училищесине туьседи. Болса да тигуьвден де артык балаларга суьйими онынъ юрегин телезитип коймайды. Кызда саьбийлерге суьйими оны «Ветерок», аьлиги «Юлдыз» балалар бавына аькелди. Ол онда тербиялавшыдынъ коьмекшиси болып куллык этип баслады. Тербиялавшы болар уьшин педагогикалык билимин алмага керек эди, эм ол Хасавюрт педучилищесининъ мектебке дейим боьлигине туьсип, оны етимисли тамамлайды.
Кеспили куллыкшы суьйген иси мен каьрлеп баслайды. Улыбийке Авсей кызы педагогикалык аьрекетинде оьзин куллыксуьер, яваплы, яратувшылыклы куллык эткен ис аьрекетши этип коьрсетип келеди. Ол оьз исинде ата-аналар ман байланыска да уьйкен маьне береди. Онынъ тербияланувшылары туьрли яратувшылык, интеллектуальлик ойынлардынъ, ярыслардынъ катнасувшылары боладылар, коьп кере енъуьвши, баргылы орынларынынъ иелери болып шыкканлар. Отыз ети йыллар ис аьрекети бойынша ол оннан артык выпускларын йолга салган. Ата-аналар да тербиялав иси бойынша Улыбийке Авсеевна ман етимисли озгарылган шараларда белсенли катнасувшылары, коьмекшилери болып келедилер. Аьр бир тербияланувшысына ол тек билим тувыл, савлай янын савкатлап келеди. Кыскаяклы уста ясап, тигип, зияпетлер писирип, даьмли аслар асып та болган оьнерлери мен белгили. Биринши дережели тербиялавшы ман балалар бавында ана тилинде «Лашын» кружогы да юритиледи. У.Акбиева саьбийлерде ана тилине суьйимин оьстируьвде оьз куьшин салып келеди. Ол балалардынъ билимин кенъейтер мыратта уьлке танув музейде, почтада, мектебте, авыл паркында эм сондай баска кызыклы ерлерде тербияланувшылары ман йыйы конакта болады.
Билимлендируьв ошагынынъ оьрлендируьви, билимлендируьв эм ямагат аьрекети бойынша коскан уьлиси уьшин «Юлдыз» балалар бавынынъ администрациясы, Ногай район билимлендируьв боьлигининъ, авыл эм район администрациясы атыннан Сый грамоталарына, Разылык хатына тийисли этилген. «Йыл тербиялавшысы» ярысынынъ катнасувшысы да болып, енъуьвши орынга тийисли этилген. Оьз ис йолдаслары арасында тербиялавшы уьйкен куллыксуьерлиги, яваплылыгы, алдыга ымтылыслыгы, каьмбиллиги мен баскаланып келеди. Сол касиет сапатлары бойынша ис йолдаслары, ата-аналар арасында сый-абырай казанган.
Сав яшавын тербиялав исине багыслап келгеннен баска, ол оьз уьш аьвлетлерининъ етимислери мен куьезленген наьсипли ана да болады. Ол Арсен, Адил эм сылув кызы Алинады тербиялап яшав йолына салган. Арсен СГУ-дынъ Терекли-Мектебтеги филиалын тамамлап, буьгуьнлерде Сургут каласында етимисли куллык этеди. Адил увылы Каспийск каласында ОМОН куллыкшысы, Алина Пятигорск калада СКФУ, оннан сонъ Сургут каласында Тюмень патшалык университетин уьстинликли тамамлап, банкта аьрекет этеди. Улыбийке Авсеевнадынъ бес уныклары оьз етимислери мен онынъ коьнъилине етпеге, куьезин оьстирмеге шалысадылар. Сол тувылма ана уьшин шынты наьсип дегенинъ!
Г.Нурдинова.
Суьвретте: Улыбийке Акбиева оьз тербияланувшылары ман.