Аьлиги заманда савлай элимиз бойынша «Коршалавшылардынъ аьвлетлери» деген акция бардырылады. Соьйтип, бу акцияда Дагестан Республикасынынъ Казбековский районында орынласкан «Главрыба» туристлик комплекси де катнасты. Специальли согыс операциясында катнасувшылардынъ балалары комплексте экскурсияда болдылар. 28 балалардынъ тыншаювы ДР Баспа эм информационлык агенствосынынъ етекшисининъ биринши орынбасары Наида Магомедовадынъ баславы ман уйгынланган.
Пандемия заманында да ол врачлардынъ балаларына сондай экскурсиялар уйгынлаган. Сол заман «Врачлардынъ аьвлетлери» деген акция бойынша Дагестаннынъ калаларыннан эм районларыннан 500 ювык саьбийлер Дербент каласынынъ беркитпесинде, Сулак каньонында, «Янтарный» комплексинде болганлар. Буьгуьнлерде акцияда Махачкала, Каспийск калаларыннан эм Ногай районыннан 28 бала катнасканлар.
– Биз Аталыгымызды коршалап турган аьскершилеримиздинъ аьвлетлерине эс этпеге ниет эттик, олар Росгвардия эм мобилизация бойынша шакыртылганлардынъ балалары. Биз айырым РФ Госдумасынынъ депутаты Абдулхаким Гаджиевке бизим баславымызды хош коьргени уьшин разылык билдиремиз. Балаларга бу экскурсия уьйкен байрам болып оьтти. Саьбийлер зоопаркта болганда, карусельлерде кыдырганда, балыкларды караганда кайтип суьйиндилер, олардынъ коьзлери яркырап, юзлери суьйинишке толдылар. Мен ойлайман, балалардынъ эсинде бу куьн коьп заманларга сакланар. Бу акцияды озгарувда оьз коьмегин эткен туризм бойынша министерствосы, айырым Эмин Мердановка савбол айтамыз, – деп соьйледи Наида Магомедова.
Сондай кызыклы экскурсиялар аьли де болаяк деп айтты ол.
Ногай районыннан экскурсияда Терекли-Мектеб, Батыр-Мурза, Червленные-Буруны эм Калининаул авыл мектеблерининъ окувшылары катнастылар. «Ногайский район» МР аькимбасы Джамалутдин Эсиргепов оьзи балаларды йолга салды эм сондай ийги ис уьшин Наида Магомедовага разылыгын билдирди.
– Кайдай ийги шара бизим балаларга уйгынланган. Аталары кеткен сонъ, балаларга кыйынлы, олар сагынадылар. Мундай тыншаюв саьбийлерге пайдалы болар. Мен акцияды уйгынлавшы Наида Магомедовага савбол айтаман, – деди район басшысы.
Ногай районында мобилизация бойынша шакыртылганларга эм олардынъ аьеллерине ярдам этуьв Орталыгы туьзилген. Баьри республикалык эм район организациялары бу фондка бир куьнлик кыйын акын йибергенлер. Янъыларда аьскершилердинъ аьеллерине коьмекке деп бу фондтан карыж шыгарылган. Солай ок саьбийлерге кетеектен алдын таьтли зияпетлер алынган.
