Аьр биримизге олар бек баалы оьз куванышлары эм кыйынлыгы ман, ярык эм куьнъирт куьнлери мен, неге десе оларда бизим кайгысыз-каьрсиз балалыгымыздынъ конъыравлы сеси, ян тоьримизди биринши суьйим сезимине орайтаган йылы эскеруьвлер, аьелде, балалар эм уныклар тоьгерегинде оьткен узак наьсипли йыллардынъ эстеликли оьзгерислери. Оларда, бу озган яшав йылларда, дуныяга энген аьр инсаннынъ акында календарьдегиге усаслы «язувлар» калады, эм эсейген вакытта, баьри оьткен яшав оьмири бияладагыдай болып, аьдем эсинде сакланганын билдиреди.
Ызлы-ызыннан куьнлер оьтип, йыл кутылганын да сезбей каламыз. Йылды йыл авыстырады, биз де соны ман бирге тамамлар келтиремиз, бир ерлерде юрек тоьрининъ кишкей кесегинде мунълы ойлар бийлемеге орын табылады. Мунълы дегеним сол: аьр йылдынъ тамамланувы аьдемнинъ яшав оьмирин бир йылга кыскартады. Арт бурылып карап, аьр озган куьнинъди алдынъа аькелмеге шалысып, тенъ-йолдасларынъ, тоьгерегиндегилердинъ айыплары бар болып, олардан кеширим тилеп, эткен исинъе разы болсанъ, янынъды парахатлык бийлейди, йыл босына озбаганына суьйинмей болмайсынъ.
2021-нши кезекли йылы шынтысы ман да тамамланды оьз куванышлары ман эм, оькинишке, кайгылары ман да.
Коьп эстеликли туьрленислер орын таптылар бизим социал-политикалык эм маданият яшавында, тек республикамыз бойынша тувыл, Ногай район еринде де. Россия Оькиметининъ Председатели Михаил Мишустин ис визити мен республика еринде болып кетти. Дагестан Республикасынынъ Аькимбасы Сергей Меликов, заман танъкыллыгына карамастан, оьзининъ бир ис куьнин бизим Ногай районына келуьвге багыслады. РФ Федераллык Йыйынынынъ Госдумасынынъ депутаты Бийсултан Хамзаев Ногай район яшавшылары ман йолыгысып, олар коьтерген маьселелерге эс берип, оларды шешуьвге федераллык дережеде себеплигин тийгистпеге соьз берди. Савлай республикамыз еринде ДАССР-дынъ 100 йыллыгы кенъ белгиленди.
Оькинишке, халк яшавында кайгылы баьле оьзгерислер де орын тапканын белгилемей болмаймыз. Оьткен йыл Чернобыль АЭС-теги эстен кетпес баьле-каза болганлы 35 йыл толды, Уллы Аталык согысы басланганлы 80 йыл оьтти. Кайдай авыр кыйынлыклардан оьтпеге туьсти элимизге, не шаклы аьдемлеримизди йойдык сол коркынышлы кайгылы оьзгерислер куьнлеринде. Элин коршалавда йигитлигин коьрсеткен халкымыздынъ данъклы увылы Алимхан Асанов тувганлы 100 йыллыгы белгиленди. Ол – бизим тарих бетлеринде, халкымыз эсинде ярык эстелигин калдырган йигит.
Оьткен 2021-нши йылымыз халкымыздынъ айтылган адабиатшыларынынъ, баска тармакларда етимисли аьрекетшилерининъ мерекели йыллары эсабында белгиленди. Айтылган ногай шаирлери Кельдихан Кумратовадынъ – 80, Бийке Кулунчаковадынъ – 75, Мурат Авезовтынъ эм Куруптурсун Мамбетовдынъ – 70, ногай аьлими Джалалдин Шихмурзаевтинъ (яткан ери ярык болсын) – 85, белгили суьвретшимиз Сраждин Батыровтынъ (яткан ери ярык болсын) – 70 йыллык мерекелерине эс каратылды район маданият тармагы эм бизим газетамыз ягыннан. Эстеликли болып оьтти 2021-нши йыл бизим «Шоьл тавысы» республикалык газетамыз уьшин де, онынъ биринши номери дуныя ярыгына шыкканлы 90 йыл толды.
Соьйтип, эстеликли оьзгерислер орын тавып озды кезекли йылымыз, эм энди 2022-нши йылда сенимлик пен алдыга абытлаймыз.
Л.Уразаева
