Ногай халкымызда ясларымыздынъ етимислери, сайлаган кеспилери бойынша етисуьвлери аьр кимди де оьктемситип келеди. Яслар – ол бизим келеектегимиз.  Алибек Эмирланович Коккозов асылы ман Ногай районынынъ Кумлы авылыннан болады. Ногай яс ис ветеранлары, Кумлы авылынынъ буьгуьнлерде сыйлы тыншаювда болган окытувшылары Ханбий Бегали увылы эм Нафисат Эдильбай кызы Коккозовлардынъ кишкей уныгы болады. Олар буьгуьнлерде студент Алибектинъ окувында коьрсетип келетаган етимислери мен оьктемсип, талаплы ястынъ алдыга сенимли барувы ман куьезленедилер.

Алибек Хабаровск каласында Эмирлан эм Гунайдаттынъ аьелинде тувган. Хабаровск каласындагы 68-нши номерли мектебинде 3-нши классты тамамлап, 4-нши класстан алып окувын Ногай районынынъТерекли-Мектеб авылынынъ Джанибеков атындагы мектебинде бардырады. Кайсы мектебте де яс йолдасларыннан окувды суьерлиги мен, кайсы исин де сонъына дейим еткеруьви мен, тенълери арасында алаллыгы ман, дослык сезимди берк баалавы ман баскаланып келди. Мектебте окув йылларында ол туьрли дерислер бойынша ярысларда, олимпиадаларда катнасып, савгалы орынларынынъ иеси 27-нши июнь – Россия ясларынынъ куьни болып келген, коьплеген Сый грамоталарга тийисли этилген. 2017-нши йыл 11-нши классты тамамлавы ман, ол коьп ойланмай, кишкейден аьскерши кесписин сайлаякпан, деген мыратлы ойын яшавга шыгарув куьни де келди.

Алибек буьгуьнлерде Воронеж каласындагы профессор Н.Е. Жуковский эм Ю.А. Гагарин атындагы согыс-авиа академиясынынъ байланыс боьлигининъ уьшинши курсынынъ студенти болады.

– Алибек, самолетлар ара байланысларды уйгынлап келуьв кесписининъ иеси болаяк. Буьгуьнлерде ол элимизде озгарылаяк Парадтынъ катнасувына аьзирлик коьрип келеди, – дейди увылынынъ етимислери мен куьезленип анасы Гунайдат.

Ол академия яшавынынъ да белсенли катнасувшысы болып келеди. Аьр куьн сайын билимин оьстирип, окытувшылардынъ берген дерислерин, борышларын сахый эм яваплы толтырмага шалысып келеди. Академия бойынша озгарылатаган илми-практикалык конференцияларда, баска туьрли амалламаларда катнасып келеди.

Келеекте де Алибектинъ алдында сынавлар, йортылаяк йоллар коьп. Тыныш болмаган кесписин сайлаган ногай яска келеекте де окувында йогары етимислер, окувын уьстинликли тамамлап, юреги мен сайлаган кесписи бойынша бийикликлерге етискенин йорайман. Алибек, йолынъ дайым да ашык болсын!

Г.Нурдинова.

                                                                                                                                                                                    Суьвретте: Алибек Коккозов.