Дагестан Республикасынынъ Аькимбасы Сергей Меликов оьз телеграм-каналында билдиргенлей, Элимиздинъ басшысы В.Путиннинъ билдирген толы болмаган мобилизацияга яваплап, Аталыгымыздынъ япсарларын явдан коршалав ниет пен оьз эрки мен спецоперацияда катнаскан аьскершилер аьеллери 100-ер мынъ маьнет акша алаяклар. Ол солай ок баьри муниципалитетлер аькимбасларын эм ерли-еринде военкомларга сол акшады тийислилер заманында алганын уйгынламага тилек салды.

Солай ок Сергей Меликов ДР Оькиметине мобилизованный дагестанлылардынъ аьеллерин яклав шараларды кабыл этуьв борышын берди. Сол планланган шаралар – республикадынъ мобилизованный яшавшыларынынъ балаларына регионнынъ йогары окув ошакларына спецквоталар шыгарув, сондай аьеллер балаларына туьрли секцияларга, кружокларга тегин барувды уйгынлав эм с.б.
ДР Аькимбасынынъ региональлик дережеде мобилизованный гражданлар аьеллерин якламага керек дегени онынъ аьдемлер маьселелерине эс каратып, Украина еринде юритилетаган спецоперациядынъ энъ басыннан алып республикадынъ баьри дережели чиновниклериннен, болаяткан затларга шеттен карап турмай, белсенли кепте ортакшылык этуьвди талаплайды. Аьр йыйында яде кенъесте Сергей Алимович мобилизованный яшавшылар аьеллерининъ маьселелерине маьне беруьв мен бу ак ниетли исте тек акылга тувыл, юрек сезимлерине эм ишки дуныясына негизленмеге шакырув этеди, а бу сезимлер регион етекшисинде кайтип оьрленгенин биз мине бир неше айлар узагында коьремиз, эм ол зат бизде оьктемлик тувдырады.