Дагестан Аькимбасы Сергей Меликов оьзининъ телеграмм-каналында США элининъ «Дагдизель» заводына карсы киргисткен санкциясы акында оьз ойын айтып билдирген.

«Быйыл дагестан предприятиеси оьзининъ 90 йыллыгын байрамшылайды. Меним ойыма коьре, ога карсы киргистилген санкция бизим заводымыздынъ Россиядынъ коршаланув болымлыгын эм аьскершилик куватын беркитуьвге этетаган косымына бек ийги белги болады», – деген ол.
Регион етекшиси «Дагдизель» торпедалар аьзирлейтаган аз санлы заводлардынъ бириси эди, буьгуьнлерде болса ол тенъиз сувы астында кулланылатаган согыс савытты аьзирлевин, дизель курылысы ман каьр шегуьвин эм патшалык коршаланув заказын толтырувын айтып белгилеген.
Меликовтынъ соьзи мен, завод коьптен бери импорт товарларын авыстырып уьйренген, сонынъ уьшин ога карсы киргистилген санкциялар – ол боьтен де пайдалы кепте куллык этуьвге эм оьрленуьвге берилип турган косымша даьвлет.
«Дагестан предприятиесин дуныя бойынша айтылганы ман кутлайман эм сонынъ етекшилерине эм ис коллективине армаган да уьстинликлер йорайман!» – деген Дагестан Аькимбасы.