Вакцинация этпеге борыш салув кампаниясы оьз аьрекетинде, болса да, аьдемлердинъ кайбиревлери яйылма коронавирус маразыннан прививка этпеге суьймей, вакцинация этуьвден бас акашпага суьетаганы биревимизге де ясыртын тувыл. Соны ман байланыста кайбир гражданлар, вакцинады эттирмей, коронавирустан ялган сертификатын байырлав бойынша туьрли йолларын излейдилер. Закон бойынша аьр кимге де вакцинация эттиргенин шайытлайтаган ялган сертификатын сатып алув, байырлав эм оны ман пайдаланувы ман уголовлык яваплылыгына тартылмага болатаганы эсинде сакламага тийисли. Ялган документлерин тек аьзирлегенлер эм яйылдырганлар тувыл, оны сатып алганлар да яваплык тутатаганы, дембиге йолыктырылатаганын мутпага керек тувыллар. Ялган сертификаты ман пайдаланувдынъ сонъы уьйкен штрафлар ман эм ярым йылга дейим тутнакка капалувы ман кавыфлы.
Ызгы заманларда биз яшавда, социаллык тармагында сондай ислери мен байланыслы билдируьвлер мен йыйы йолыгатаган болдык. Сондай кыянатлы ислердинъ йолын шалув бойынша, биз коронавирустан вакцинация этилгенин шайытлайтаган сертификатын закон бойынша кайтип аьзирленетаганы эм оны кайтип алмага болатаганы акында Ногай район орталык больницасынынъ врач-эпидемиологы Аклима Зиявдин кызы Нургушиевага хабарламага тиледик.
– Биз кабинетимизде COVID-19 вакцинация этиледи. Биз район гражданларына «Гам-Ковид-Вак», «ЭпиВакКорона», «Спутник Лайт» препаратлары ман вакцинация этемиз. Вакцинациядынъ акында билдируьвлери коронавирустан прививка этилгенлердинъ федераллык регистрине киргистиледи. Солай болып сол зат ялган справкаларын сатып алувдынъ йолын бувады. Коронавирустан вакцина этилгенлердинъ федераллык регистри тергелмей, бир аьдемге де справка берилмейди, неге десе ялган билдируьвлерди коьрсетуьв – ол уголовлык кыянатлык иси болады.
Сонынъ уьшин справкадынъ артыннан аьдем келсе, биз вакцинация этилгенлердинъ федераллык регистри бойынша прививка этилгенин яде этилмегенин, вакцинадынъ эки де кезегин алганын тешкеруьвли тергеймиз эм сол билдируьвлерин справкада коьрсетемиз. Тек соннан сонъ поликлиника етекшиси мен сол справка беркитиледи, – деп белгилейди Ногай район орталык больницасынынъ эпидемиолог врачы Аклима Нургушиева.
Г.Нурдинова.
Суьвретте: Аклима Нургушиева.
