2019-ншы йылдынъ 14-нши октябрь айыннан алып Россиядынъ 21 регионында, сонынъ санында Дагестан Республикасында аналоглы федераллык телеканалларынынъ ислеви токтатылаяк. Аьлиги заманга келисли алатларын эртеректе сатып алган телекаравшылар 20 цифра кебиндеги телеканалларды карамага амал табаяклар. Соны ман бирге «аналогта» бир неше федераллык каналлары, мысалы, «Че» эм «Ю», солай ок регионаллык эм муниципаллык телеканаллары (областьлер, районлар телекомпаниялары) калаяклар.
Цифра кебинде телеберуьвлерге коьшуьв уьшин не зат этпеге керек? Ал деп, оьз телевизорларынъызда «А» элиби бар ма, йок па экенин каранъыз. Сондай элип логотипы ман бирге «Первый канал», «Россия 1», НТВ, «Пятый канал», «Рен ТВ», СТС, ТНТ, «Звезда», «ТВ Центр», «Россия Культура» 10 аналоглы телеканалларында ерлестирилген. «Эгер сизинъ телевизорынъыздынъ экранында «А» элиби йок болса, ол заман сиз эфирде кабель яде спутник аркасы ман цифра кепли телевидениеди карайсыз. Ол заман сизинъ телевизорынъыздагы бир канал да токтамаяк, сизге приставка сатып алмага керек тувыл.
Эгер сиз «А» элибин коьрсенъиз, сизге цифра кебине коьшуьв керегеди. Сога косылув уьшин айырым бир билимлер яде сулып керек тувыл.
Янъы стандартлы сигналды ыслав уьшин сизге керегеди:
1. Сизинъ авылынъызда цифра кепли эфир трансляциясынынъ барлыгы (соны сиз карта.ртрс.рф сайтына кирип тергемеге боласыз).
2. DVB-T2 стандартлы, Multiple-PLP режимли эм дециметрлик диапозонлы приемный антеннасы болган телевизордынъ болувы. Эгер сондай алат йок болса, соны сатып алув керегеди (телевизорды авыстырып олтырмай, тийисли приставка сатып алмага да болады).
3. Цифра кебиндеги эфирли телевидениеди карав уьшин телеканалларды автопоиск йорыгы ман излестирмеге де ярайды. Солай ок телеканалларды кол йосыгы ман да онъламага болады. Сонынъ уьшин телевизионлык каналынынъ частотасын яде номерин киргистуьв тарык болады. Сонынъ акында билдируьвди РТРС официаллык сайтындагы «Строительство сети цифрового ТВ» боьлигинде яде карта.ртрс.рф сайтында таппага болады.
Цифра кебинде телевидениеди карайтаганынъызды кайтип билмеге болады?
Соны билуьв уьшин бир тыныш йорык та бар: эгер сиз телевизорынъыздан «Карусель» каналды карайтаган болсанъыз, ол заман сиз дуп-дурыс цифра кебинде телевидениеди карайсыз. Бу телеканалды аналоглы кебиндеги телевизор коьрсетпейди.
