Бу куьнлерде Дагестан Республикасынынъ бас каласы Махачкаладагы «Россия – меним тарихим» паркында Уллы Аталык согысына багысланган «Согыс. Баьтирлер эм олардынъ йигитлиги» деп аталган мультимедийный выставка ашылды.

Сол выставка ишинде сегиз экспозиция коьрсетиледи. Солар Уллы Аталык согысынынъ энъ де белгили баьтирлерининъ йигитлиги акында хабарлайдылар.
Уьш юма узагында келген конаклар йигитлик эткен аьдемнинъ акында билдируьвлер эм проекция аркалы тирилген тарихти коьрееклер. Бу бек кызыклы выставка.
Баьриси сахнада 10 баьтирдинъ йигитлиги акында хабарланады. Сонынъ ишинде Александр Матросов, Зоя Космодемьянская, Николай Гастелло эм коьплеген баскалар бар.
Солай ок каравшыларга «Сталинград уьшин согыслар» деген экспозиция да бек кызыклы болар. Сол йылларда урыслар озган ерлер коьрсетилип, баска карас пан да каралаяк эм аьлиги заманларда сол ерлердинъ коьрки де коьрсетиледи.
«Савга оьз баьтирин тапкан» деген боьлигинде баьтирлерди тири этип коьрмеге болады.
Уллы Аталык согысында мынълаган аьдемлер оьз йигитликлери уьшин савгаланмай калганлар, сонынъ акында выставкадынъ «Савгаланмай калганлар» деген боьлигинде хабарланады.
«Сейирли куткарув» деген выставка боьлиги Уллы Аталык согысында катнаскан, кайдай кыйынлыкларды да коьрген, тек кайдай бир себеплерден яшав оьмири уьзилмей калганлар акында хабарланады.
«Онынъ заманы йок» деген боьлик сандык кебинде уйгынланган. Мунда сандык туьбинде кайтараланмага керек тувыл оьзгерислер салынганлар.
Выставкадынъ ызгы боьлиги «Енъуьв язлыгы». Сол келген конакларга Уллы Аталык согысынынъ баьри авырлыгын коьрсеткеннен сонъ, енъуьвдинъ суьйинишин де коьрсетеди. Эм тамамлав боьлик «Коьлемлик йигитлик». Мунда болса, савлай халктынъ йигитлиги акында хабарланады.
Выставка уьстимиздеги йылдынъ кырк кийик айынынъ 3-нши куьниннен алып 26-ншы куьнине дейим бардырылаяк.