Уллы Аталык согысынынъ атыслары тынганлы коьп йыллар оьтти. Неше йыллар оьтсе де, биз йыл сайын Элимизди явдан коршалаган, бизим тынышлыкты саклаган баьтирлерди эсимизге аламыз. Согыс неше йыл, ай эм куьн болганын, сол йыллар неше кала бузылганын санамага болады. Тек саналып болмайды ол ашшы эм каты кавга нешаклы каза эм баьле аькелгенин эм коьз яслар тоьктиргенин.
Тувган ер аьр бир аьдемнинъ яшавында уьйкен орынды тутады, неге десе мунда янга якын аьдемлер яшайдылар. Тувган ерине суьйими акында аьдем онынъ тарихин, озганын эм аьлигисин билмей айтып болмайды. Ногай район яшавшылары уьшин 1942-нши йылдынъ куьз айлары бек маьнели болады. Сол айларда Ногай (Караногай) районы немец- фашистлериннен босатылган. Бу куьнлерде биз аталарымыз, атайларымыз эм уьйкен атайларымыз эткен йогары баьтирликтинъ 80 йыллыгын белгилеймиз.
Янъыларда сол данъклы эм эстеликли оьзгерислерге багысланып, район орталык китапханада «Согыс акында биз ятлавлар ман айтамыз» деп аталган ятлав окув конкурсы оьтти. Мунда А.Джанибеков эм Кадрия атындагы мектеблерининъ 8-11-нши класс окувшылары катнастылар. Балалардынъ ятлав окув оьнерине белгиди Ногай район билимлендируьв боьлигининъ методисти Альфира Мурзагишиева, Ногай драмалык театрынынъ артисти Сакинат Кувандыкова, Ногай район судынынъ куллыкшысы, китапхана окувшысы Диана Яхьяева бердилер.
Балалар К.Симонов- тынъ, Э.Асадовтынъ, Р.Рождественскийдинъ, Ф.Алиевадынъ эм баска шаирлердинъ ятлавларын яттан айттылар. Шаирлердинъ лирикалык шыгармаларында совет халкымыздынъ йигитлиги, Элине суьйими, коьрген кыйынлыклары ашык коьрсетилинген.
Окувшылар конкурска бек яваплы карап, ийги аьзирленген эдилер. Олар шалысып, сезимлери мен ятлавлар окыдылар. Ушынын айтсам, окувшыларды коьзясларды тыйып тынълав тыныш тувыл эди. Элбетте, балалардынъ оьнери тынълавшыларды сукландырды.
Жюри агзалары берген белги бойынша, 1-нши орынга – Кадрия атындагы мектебининъ окувшысы Милана Зарманбетова, 2-нши орынга – А.Джанибеков атындагы мектебининъ окувшысы Мамат Ахмаджанов, 3-нши орынга Тамерлан Бибулатов (А.Джанибеков атындагы мектеби) тийисли этилиндилер. Солай ок жюри агзалары Милана Боранбаева ман Авасхан Менглиязовады белгиледилер. Баргылы орынларды бийлеген баьри балаларга савкатлар тапшырылды.
Н.Кожаева.
Суьвретте: баргылы орынлар бийлеген окувшылар.