Оьзининъ эткен ислери мен, йигитлиги мен коьп несиллердинъ эсинде ыз калдырган аьдемлер болады. Бизим ногай халкымыз да оьзининъ баьтирлери мен оьктемсийди. Олардынъ бириси Хайрудин Лукмановка быйылдынъ 21-нши сентябринде тувганлы 100 йыл толды. Соны ман байланыста согыс, ис эм спорт ветеранынынъ эстелигине Ногай районында йыл сайын озгарылатаган 30-ншы футбол турнири уйгынлы оьтти.
Терекли-Мектеб авылындагы язгы маданият уьйининъ алдында Ногай район администрация, организациялар куллыкшылары, окытувшылар, окувшылар эм согыс ветераны Хайрудин Лукмановтынъ кардаш-тувганлары, балалары, уныклары эм немерелери йыйылдылар. Шарадынъ шатлыклы кезегин Бурлият Курманова эм Гюльгерен Савкатова ашып, юриттилер. Биринши болып йыйылганларды Ногай район администрациясынынъ аькимбасынынъ орынбасары Баймагомед Ярлыкапов кутлады. Оннан сонъ Хайрудин Аджидаировичтинъ увылы, Карашай-Шеркеш Республикасынынъ ат казанган врачы Зиявдин Лукманов йыйылганлардынъ баьрине де оьз разылыгын билдирип, балаларга футбол ойнавда уьстинликлер йорады. Солай ок сыйлы согыс ветераны, уьйкен аьриптен окытувшы, ийги аьдем Хайрудин Лукмановты бу куьн Ногай районынынъ оьрметли ясуьйкени Зубаир Аджибаев, солай ок коьп йыллар окытувшы болып куллык эткен Сталинбек Муллаев, 1-нши номерли Балалар –яслар спорт школасынынъ етекшиси Айдархан Курманбаев, Хайрудин Аджидаировичтинъ окувшысы Рашидхан Отарбаев эсине алдылар. Олар ясларга сыйлы ветераннан коьрим алмага маслагат эттилер. Шарадынъ шатлыклы кезегиннен сонъ йыйылганлардынъ коьнъиллерин йырлавшыларымыз Аминат Кудайбердиева, Рашидхан Менлигулов, Мурат Байгазиев оьз йырлары ман эм саз алатта ойнавы ман Зарина Шадирова коьтердилер. Солай ок Хайрудин Лукмановтынъ немерелери Алина эм Алима йырлар йырладылар.
Мине 2011-2012-нши йыл тувган яслардан туьзилген 8 команда катнасувы ман кызыклы ойынлар басландылар. Мунда Куьнбатар, Карагас, Терекли-Мектеб, Червленные Буруны, Тарумовка эм Шешен Республикасынынъ Сары-Су авылларыннан эм Южно-Сухокумск каласыннан окувшылар катнастылар. Турнир сырагылары бойынша 1-нши орынды Сары-Су авылынынъ яслары бийледилер. Куьнбатар авылынынъ яслары – 2-нши, Южно-Сухокумск спортсменлери – 3-нши орынларга тийисли болдылар.
Ойынлар озгарувды 1-нши номерли ДЮСШ етекшиси Айдархан Курманбаев уйгынлады, бас тоьреши тренер Алавдин Башантавов эди. Солай ок Терекли-Мектеб авылынынъ яслары эм спорт ветеранлары да оьз куьшлерин кызыклы футбол ойынында сынап карадылар. Яслар алдыда болдылар.
Турнир катнасувшылары Сый грамоталар ман, медальлер мен, савгалар ман савгаландылар.
Н.Эрежепова.
Суьвретте: Х.Лукмановтынъ кардаш-тувганлары.
