Дагестан Республикасынынъ Аькимбасы Сергей Меликов оьткен юмада коронавируслы маразга карсы турув оперативли штабынынъ йыйынында билимлендируьв учреждениелеринде дистанционлы окув кебин киргистуьв бизим республикамызда болмага керек тувыл деген ойын билдирген.
Сол тема бойынша «Шоьл тавысы» республикалык газетасынынъ куллыкшысы Г.Сагиндиковага А-Х.Джанибеков атындагы мектебининъ етекшиси Курасхан Джумагельди кызы Ярикбаева оьз ойын билдирген.

– Коронавируслы маразына карсы турув оперативли штабынынъ йыйынында билимлендируьв учреждениелеринде дистанционлы окув кебин киргистуьв акында ой да болмага керек тувыл дегени бизди суьйинтеди. Бу куьнлерде, Сергей Алим увылы Меликовтынъ билдируьвине коьре, савлай республикамыз бойынша аьллер осал тувыл, сога коьре окувшыларды дистанционлы окув кебине коьшируьв керекпейди.
Бу куьнлерде биз оьз мектебимизде баьри керекли санитар йорыкларды тутамыз. Аьллерге коьре, аьр бир класс окувшыларына бир кабинет беркитпеге туьседи, олар сонда тазалыкты тутув шараларды озгарып турадылар. Дерислер араларындагы танапыс заманы да соьйтип, балалар бир-бириси мен сийрек йолыккандай этип салынады. Окытувшылар ман эм белгиленген окувшылар ман эсиктинъ алдында кирген балалардынъ эт кызувы тергеледи, колларын антисептиклер мен тазалатадылар. Бизде сондай санитар-эпидемиялык алатлардынъ кулланылувы да бизге авырувлылар санын азайтпага амал береди. Эгер окытувшылар эм окувшылар араларында авырувлылар йок болган ерде, неге биз окувдынъ дистанционлы кебине коьшпеге керекпиз.
Окувды дистанционлы кепте озгарув енъил тувыл, сондай окув кеби балалардынъ билимлерининъ дережесин туьсиреди. Мектебте озгарылатаган деристе 45 такыйка ишинде бала коьп зат алады, а дистанционлы окув кеби коьп зат бермейди, окытувшы да баьри балаларды да коьрип болмайды.
Бизим мектебте ис аьрекетин бардыратаган окытувшылар баьриси де коронавируслы маразга карсы вакцинады алганлар, сонынъ уьшин биз оьз аьрекетимизди таза намыс пан, келеектегимиз уьшин рахатлык пан бардырамыз.