Уьстимиздеги йылдынъ коькек айынынъ 14-нши куьнинде Ногай районынынъ Карагас авылында киши футбол майданы ашылды. Бу майдан авыл япсарларын оьрлендируьв программа ишинде курылган. Майдан, аьлиги заманнынъ баьри янъы технологиялары кулланылып, курылган. Сол туьзлик спорт курылысы (мунда киши футбол эм волейбол майданлары ерлестирилген) авыл яшавшыларына бек ийги савга болады. Сол майданнынъ ашылувы Карагас эм сонынъ тоьгерегиндеги авыл яшавшыларына уьйкен байрам болды.

Белгилеп озайык, бу спорт майданы Дагестан Республикасынынъ Аькимбасы Сергей Меликовтынъ буйырыгы ман, «Дагестан Республикасынынъ авыл ерлеринде комплексли оьрлендируьв» деген патшалык программасы ишинде курылган. Оннан алдын Ногай район администрациясынынъ аькимбасы Мухтарбий Аджеков республика етекшилерине муниципалитет япсарларында социаллык объектлерин курув эм инфраструктурады оьрлендируьвде оьз коьмеклерин этпеге тилек салган эди.
Сол «Дагестан Республикасынынъ авыл ерлеринде комплексли оьрлендируьв» деген патшалык программа ишинде бизим Ногай районымызда аз куллыклар этилинмейди. Оьткен 2021-нши йыл Ногай районынынъ Сылув-Тоьбе авылында уьш шакырым ерге газ тартылган эм буьгуьнлерде Карагас авыл яшавшыларын суьйинтип турган, 1538 квадратлы метр оьлшеми болган, спорт майданы курылып басланган эди.
Ногай районымыз бойынша яшавга шыгарылатаган баьри проектлер де Дагестан Республикасынынъ Оькиметининъ Председатели Абдулмуслим Абдулмуслимовтынъ тергеви астында турады.
Э.Кожаева.
Суьвретте: киши футбол майданы ашылув мезгили.