Ногай район орталыгындагы Халк яратувшылык уьйинде (РДК) КПРФ Ногай РК аьрекети мен аьдетли шахмат турнири болып озды. Быйылгы шахмат турнири СССР курылганлы 100 йыллыгына багысланган эди.

Ярыстынъ алдында сонынъ катнасувшыларына каратылган соьзи мен ДР Халк Йыйынынынъ депутаты, КПРФ Ногай РК 1-нши секретари Мурзадин Авезов, онынъ коьмекшиси Абрек-Заур Лукманов, район Ветеранлар советининъ председатели Акманбет Сангишиев, район Ямагат палатасынынъ председатели Эльмурза Саитов, спорт ветераны Сталинбек Муллаев, шахмат ойыны бойынша окытувшы Арслан Елакаев шыгып соьйледилер. Олар баьриси де алдынгы элимиз – Совет Союзы оьз заманында дуныяда куватлы эм абырайлы патшалык болганын белгиледилер.
Муннан сонъ шахмат турнирининъ катнасувшылары оьзлери ара йолыгыс озгардылар. Кызыклы турнирдинъ сырагысында сонынъ енъуьвшиси деп Червленные Буруны авыл орта мектебининъ 6-ншы класс окувшысы Альмира Киреева танылды. Катнасувшылар Алимхан Аюпов 2-нши орынды эм Солтан Валиев 3-нши орынды байырладылар. Оларга баргылы орынларды казанганы уьшин кубоклар берилди.
Турнирдинъ баьри катнасувшыларына да КПРФ Орталык Комитетининъ Сый грамотасы эм эстеликли савгалар тапшырылдылар.
М.Юнусов.
Суьвретте: шахмат турнирдинъ енъуьвшиси Альмира Киреева.