Келеяткан янъы 2023-нши йылда бизим элимиз Сталинград согысында совет аьскерлерининъ немец-фашист аьскерлерин енъуьвининъ 80 йыллыгын шатлыклы кепте белгилеек.
Сталинград согысы тек Уллы Аталык кавгасынынъ тувыл, ама савлайы Экинши дуныя согысынынъ энъ уьйкен бас стратегиялык урысларынынъ бириси болып саналады. Сталинград согысында совет аьскерлерининъ енъуьви савлайы кавгады тамырыннан туьрлентуьвге эм 1945-нши йылдагы Уллы Енъуьвге кенъ йолды ашкан.
Быйылдынъ 15-нши июлиндеги Россия Президентининъ «Сталинград согысында совет аьскерлери немец-фашист аьскерлерин бузгышлаганлы 80 йыллыгын байрамшылав акында» деген Указы ман келисли аьлде Волгоград каласы эм области ветеран организациялары ман бирге бу тарих оьзгеристи байрамшылавга аьзирлик коьруьв бойынша белсенли куллык юритедилер. Сондай шаралардынъ санында 2023-нши йылдынъ 1-2-нши февраль куьнлеринде «Эстелик коьпири» деп аталган уьйкен тарих-патриот проекти яшавга шыгарылмага каралады. Бу проектке коьре баьтир-каладынъ согыс-тарих маьнелиги болып саналатаган эстеликли ерлерин, сонынъ орамларын, меканларын, мемориаллык объектлерин бирлестиретаган ортак бир художестволык майданы туьзилеек.
«Россиядынъ оьлимсиз полкы» ООО ГПД ман туьзилген келисуьвге коьре «Заманлар байланысы» маданият проектлерин яшавга шыгарув орталыгы» АНО Сталинград согысынынъ катнасувшыларынынъ фотосуьвретлерин йыюв бойынша акциядынъ басланувы акында билдирген. Баьтирлердинъ фотосуьвретлери Волгоградтагы Баьтирлер Аллеясындагы уьйкен светодиодлы экранларда орынластырылаяк. Сонынъ уьшин фотосуьвретлерди эм документлерди «Россиядынъ оьлимсиз полкы» ОО ГПД https://www.polkrf.ru/ официаллык сайтына «Сталинград согысынынъ катнасувшысы» деген белгиси мен киргистпеге яде geroi-stalingrada@mail.ru электрон почтасынынъ адресине йибермеге боласыз.
Соны ман байланыста Ногай район яшавшылары да оьз аталарынынъ эм атайларынынъ, Сталинград согысынынъ ортакшыларынынъ атлары эм тукымлары ман фотосуьвретлерин йогарыда коьрсетилген адреслер мен йибермеге эм сол куьнлерде Волгоградтагы эстеликли шараларда оьзлери де катнаспага боладылар.
