Язда биз баьримиз де сувга туьспеге суьемиз, эм шомылув шагы да ашылады. Кырда куллык этетаган йолдасларымыз да тувган ерлерине кайтадылар, аьдемлер саны да коьп болады. Олар да сув ягаларына барып тыншаймага суьедилер, ама сув да зарарлы болып, аьдем оьмирине кавыфлы болмага болады.

Коьбисинше, аьдемлердинъ сувда казага йолыгувларынынъ бас себеби – тийисли йорыкларды тутпав. Бир ерлерде эр кисилер алкоголь ишимликлерин кулланып та, шомылмага сувга туьседилер. Сувда балалардынъ да оьмирлери кыскарган ерлер боладылар, сонынъ болса, бас себеби, уьйкенлердинъ, ата-аналардынъ балаларына тийисли аьлде карап болмавы болады. Сондай кыйын аьлге калмас уьшин балаларды яслай сувда кайтип юритпеге керегин, кагыйдалары ман таныстырмага керекпиз. Балаларынъызга сувда оьзин юритуьв йорыклар ман таныстырып турынъыз, сувга бирден кирмеге, йогарыдан тоьменге сувга шоршымага, оьткир алатларды сувга тасламага ярамайтаганын анълатув да бизим борышымыз болады. Солай ок, сувда юзуьв, коршалав алатларга да сенип калмага ярамайды, солар сизинъ балаларынъыз бан бирге авдарылып, бала ютылмага болады. Баьри заттан да энъ маьнелиси – балаларды сувда каравсыз калдырмага ярамайды.
Эгер дейим, оьзинъиздинъ яде баска биревдинъ ойсызлыгыннан казага йолыккан болсанъыз, ютылаятырган аьдемди шашыннан яде уьстиндеги кийиминнен тартып шыгармага керек. Ютылган аьдемнинъ тыныс алув тармагынынъ ислеви 3-5 такыйкалардан токтайды, ама онынъ юреги 15 такыйкага дейим де ислейди. Сога коьре, сол заман ишинде ярдам этпеге шалыспага керек. Бу ерде биринши ярдам – тыныс алмага коьмек этуьв.
Сыйлы ата-аналар, шо- мылган заманларда, балаларынъызга тийисли йорыкларды тутпага маслагат беринъиз эм билгенинъизди уьйретип турынъыз.
К. Акмурзаева,
Ногай районы бойынша Россия ОМВД-сынынъ ПДН эм ОУУП ПДН куьбининъ тамада инспекторы полиция майоры.