Оьткен тыншаюв куьнлеринде Россия Федерациясынынъ Оькимет Думасынынъ депутаты Султан Хамзаев Ногай районынынъ Терекли-Мектеб авылынынъ яс футболшылары ман йолыгысты. Балалар мунда онынъ шакырувы ман Ногай район аькимбасы Мухтарбий Аджековтынъ эм оьз тренери Алан Ярикбаевтинъ басшылавы ман келгенлер.

Алдын, оьткен йылдынъ 2-нши декабрь куьнинде, «Единая Россия» Савлайроссиялык партиясынынъ 20 йыллыгына багысланып оьткерилген юма ишинде С.Хамзаев Ногай район гражданлары ман йолыгысып, кайбиревлерди оьз маьселелери бойынша айырым кабыл этип алды.
Сол куьн С.Хамзаев балалардынъ футбол командасынынъ тренировкасында да болды. Олардынъ аяк кийимлерине эс этип, шынты спорт кийимин алып бермеге соьз берди.
Эм мине буьгуьн балалардынъ мыратлары толды. Султан Хамзаев, балалардынъ эртенъги шак тамакланувын уйгынлаганнан сонъ, оларга янъы спорт кийимлерин эм футбол топларын савкатлады. Яс футболшылар уьйкен коьнъилликте депутат пан аьллестилер. Олар депутатка келеектеги спорт планлары акында хабарладылар эм Султан Хамзаевти оьзлерининъ бир яркын ойынына конак этип шакырмага соьз бердилер. Депутат оьз ягыннан оларга ден савлык эм футбол ойынында йогары уьстинликлерге етисуьвди йорады.
Район аькимбасы Мухтарбий Аджеков Султан Хамзаевке Ногай районынынъ маьселелерине айырым эс карататаганы уьшин оьз разылыгын билдирди эм Россия Государтволык Думасында депутатлык аьрекетинде уьстинликлер йорады.
Яс футболшылардынъ РФ Государстволык Думасынынъ депутаты Султан Хамзаев пен йолыгысувы бек кызыклы эм коьтеринъки коьнъилликте озды. Окувшылардынъ ата-аналары районымыздынъ сыйлы гражданини С.Хамзаевке оьз разылык соьзлерин караттылар, ак юректен ога оьз аьрекетинде уьстинликлер йорадылар. Онынъ бизим Ногай районына айырым эс карататаганы, оьзек те, суьйинтпей болмайды.
Сол куьн балалар Олимпиадага аьзирлик коьруьв орталыгына экскурсияга да бардылар.
Э. Кожаева