Аьдемнинъ иси онынъ тек коьп йыллар бир ерде куллык этуьви мен де тувыл, ама аьр куьн эртен турганда, сол куьнги иси акында ойлап турувы эм куьн узагы ис орыны уьшин йогары яваплык тутып аьрекетлеви мен маьнели.
К.Б.Оразбаев атындагы Бораншы авыл орта мектебининъ директоры Бектемир Маутей улы Зарболганов – сондай аьдемлер сырасыннан.
Бектемир Зарболганов Ногай районы еринде мектеб директорларынынъ энъ де эслиси болады. Ол 1982-нши йылда Дагестан патшалык пединститутын окып кутарып, физика дерисининъ окытувшысы кесписи мен тувган Бораншы авылдынъ 8 йыллык мектебине ислемеге келген. Соннан 3 йыл оьткен сонъ, мектебтинъ алдынгы директоры Адильхан Коймурзаев ти- йисли тыншаювына шыгувы ман байланыста онынъ эм район билимлендируьв боьлигининъ етекшилерининъ биргелес маслагаты ман яс окытувшыды агайдынъ орынына беркитедилер. Соьйтип, яс болса да бас дегенлей, Бектемир Маутей улы яваплы куллыгына яс кайраты ман кириседи. Соннан алып бу куьнлерге дейим ол, тувган мектебин тасламай, сонынъ окытув эм тербиялав куллыгын оьрлентуьвге оьмирин багыслап келеди.
Етекшидинъ куллыгы, йогарыда белгиленгенлей, онынъ неше йыл ислегени мен тувыл, ама коллективин кайдай уьстинликлерге еткеруьви мен етимисли. Б.Зарболгановтынъ басшылыгы ман йогары уйгынлы, алдыга ымтылган, оьз ис аьрекетининъ хайыры уьшин уьйкен яваплык туткан окытувшылар коллективи туьзилген. Мектеб окувшыларын аьзирлев исининъ оьлшеми эм сапаты, иштелиги патшалык билимлендируьв стандартларынынъ талаплавларына келисли.
Бектемир Маутей улынынъ етекшилиги мен Бораншы авыл мектеби 1998-нши йылда Савлайроссиялык «Йыл мектеби – 98» деген конкурста катнасып, сонынъ лауреаты болган. Мектебке сондай уьстинлиги уьшин бу конкурстынъ уйгынлав комитети атыннан «Йыл мектеби – 98» дипломы, онынъ етекшисине «Йыл директоры – 98» дипломы берилген. Соннан уьш йыл оьткен сонъ, мектеб коллективи тагы да, тап сондай бийик уьстинликти кайтаралап, эндигиси «Йыл мектеби – 2002» Савлайроссиялык конкурстынъ енъуьвшиси, а Бектемир Маутей улы «Йыл директоры – 2002» деген савгага тийисли болады. Онынъ сондай ис етимислери акында «Махачкала» деп аталган газетасы 2002-нши йылдынъ 20-ншы кырк кийик айындагы «Профессионаллар» рубрикасы астында «Маьселелер шешилееклер» (авторы Г.Багиров), сол ок йылдынъ 9-ншы казан айындагы «Дагестанская правда» республикалык газетасы – «Куллык тербиялав факторы эсабында», 2001-нши йылда «Учитель Дагестана» газетасы «Оьз исининъ энтузиасты» деген макалаларын баспалаганлар.
2000-ншы йылларда мектеб окувшылары С.Мамаева Р.Гамзатовтынъ яратувшылыгына багысланган республикалык сочинениелер конкурсында енъуьвши, Н.Шоматова «Тавлар эм тавлылар» республикалык сочинениелер конкурсында баргылы орынды, Э.Махмузов Савлайроссиялык экология темасына багысланган сочинениелер конкурсынынъ енъуьвшиси болганлар. Э.Махмузовка сол етимиси уьшин «Артек» балалар лагерине путевка берилген. Бу мектебтен ол сондай дережели лагерьге барып келген экинши окувшы болады. Мектебти окып кутарган Гульфира Дуйсенбиева Дагестан авыл хозяйство академиясынынъ студенткасы эсабында 2008-2009-ншы окув йылында ийги окувы уьшин айырым патшалык стипендияга тийисли болган. Ол 2014-нши йылда экономика илмилер кандидаты уьшин диссертациясын уьстинликли яклаган, 2016-ншы йылда Гульфирага ДР ат казанган билимлендируьв куллыкшысы деген сыйлы ат берилген.
Мектеб окытувшылары арасыннан биология окытувшысы Альбина Култаева 2004-нши йылда «Йыл окытувшысы» район конкурсында 1-нши орынды алган эм бу конкурстынъ республикалык кезегинде ортакшылык эткен.
Бектемир Маутеевич район еринде бириншилерден болып, оьз мектебининъ яныннан ер участокларын алып, емис тереклер бавын оьстирген. 2015-нши йылда Бораншы авыл мектеби окувшы производстволык бригадаларынынъ эм окув-сулып участогы болган билимлендируьв учреждениелерининъ республикалык конкурсында да катнасып, 3-нши орынды бийлеген. Ога дейим 2003-нши, 2006-ншы йылларда болса сондай конкурста мектеб окувшылары эки кере енъуьвши болганлар.
Мектебте коьп йыллардан бери окытувшы Тимур Елакаевтинъ етекшилеви мен районда энъ ийги деген шахмат кружогы да аьрекетин бардырады. Мектебтинъ шахмат командасы болса, район эм республикалык «Ак ладья» турнирлерининъ бир неше кере енъуьвшиси болган.
Быйыл коькек айында Бораншы авыл мектебининъ окувшылар футбол командасы район ярысларында 3 кере ызлы-ызыннан язлык кубогын уткан эм сол кубокты эндигиси оьзлеринде калдырган.
Бектемир Маутей улы оьзининъ етекшилев кеспи билимин эм сулыбын оьстируьв уьстинде токтавсыз куллык этуьви акында онынъ эм мектеб коллективи атына тапшырылган бек коьп Сый грамоталары, дипломлары шайытлайдылар.
Б.Зарболганов белсенли эм минсиз узак заман куллык этуьви уьшин 1993-нши йылда «РФ халк билимлендируьв отличниги» деген коькирек белгиси, 2007-нши йылда болса «ДР ат казанган окытувшысы» деген сыйлы савгаларга тийисли болган.
Тувганлы 60 йыллыгы ман байланыста Бектемир Маутей улы республикалык профсоюзлар организациясынынъ председатели М.Амиродинов атыннан Сый грамотасы ман савгаланган.
М. Юнусов.
Суьвретте: Б. Зарболганов.
