Социаллык тармагынынъ куллыкшылары ак ниетли, ярдам этуьв мен байланыслы исти бардырадылар. Сол куллыкты тек танъ эм юмсак юрекли аьдемлер толтырып боладылар. Оларды етекшилеген аьдем ше? Кайдай онынъ касиетлери болмага керек? Онда ясуьйкен, сакат яде баскаларга юрек авырувы, соны ман бирге тыныш болмаган аьрекетти бардырувда керекли кадер катылык та болмага тийисли.

Соьйтип, «Ногайский район» МО администрациясында Яшавшыларды социаллык яктан канагатлав комплексли орталыгынынъ (КЦСОН) етекшиси Гульфира Капитуллаевага карап, бардырган исинде керекли болган баьри ийги касиетлерди табаман.
Гульфира Капитуллаева асылы ман – Карагас авылыннан. Онынъ атасы Мавлимберди Касьянович Уллы Аталык согысынынъ катнасувшысы болган, коьп йыллар узагына етекшилейтаган ис орынларда куллык эткен. Ол управляющий, партком секретари ислерин бардырган. Мавлимберди Капитуллаев оьз куллыгына айлак та яваплы аьдем болган. Кызалактынъ анасы Базархан Аджикурмановна райПО-да туькенши болып ислеген. Онынъ туькенге келген аьдемлер мен аьллесуьвин, йылы соьйлевин коьплер эсинде саклайдылар. Эне соьйтип ата-анасынынъ ийги касиетлери кызы Гульфирага коьшкен болар.
Капитуллаевлердинъ татым аьелинде бес бала – бир увыл эм доьрт кыз тербияланган. Яшавда аьр бир ис, болган оьзгерислер танълагы куьнге, келеектегиге оьз себебин тийгистпей болмайды. Соьйтип, Мавлимберди эм Базархан Капитуллаевлердинъ уьйкен балалары кишкейлерининъ окувын карап, оларды балалар бавына элтеп, оннан кайтарып аькелип, бир-бирине коьмекши эм ярдамшы болып турган аьелде оьскен кызалак келеекте де ярдам этуьв мен байланыслы исти сайлаган. Тек сайлап та калмады, сол исти йогары дережеде де толтырып келеди.

Карагас авыл мектебин окып тамамлап, Гульфира Капитуллаева Ленинград областиндеги Кронштадт каласында ПТУ-да окыган. Ол Кронштадт каласында озган яс йылларын бу куьнлерде йылувлык пан эскереди. Яшавында бек пайдалы болган маслагатлар берген окытувшыларына ол ден савлык йорайды.
Студент йыллары бек аьлемет заман. Сол йыллар окув ошагында туьрли кызыклы шаралар озгарыладылар, янъы тенъ дослар, кыймаслар табыладылар. Соьйтип Гульфира Капитуллаева да конкурсларда белсенли катнаскан, янъы кыймаслар тапкан. Тувган ериннен узак ерде болып, авылын, уьйин, ата-анасын сагынса да, Гульфира Капитуллаевады элимиздинъ сырттагы бас каласынынъ ярасыклыгы, янъы ашык йоллар оьзиннен йибермейди. Яс кыз Кронштадт каласында ис аьрекетин басламага токтасады. Мунда окыган эм ислеген йыллары ога ис эм аьдемлер мен катнасув сулыбын оьстируьвде бек пайдалы болды деп кыскаяклы санайды.
Гульфира Мавлимбердиевна Кронштадт каласыннан кайтып Терекли-Мектеб авылындагы Ленин атындагы совхозында токарь болып ислеген. Кайратлы яс кыз «Путь Ленина» совхозында комсомол комитетининъ секретари болып куллык эткен йылларда да оьзин ийги яктан коьрсеткен.
Гульфира Капитуллаева «Ногайский район» МО-да КЦСОН орталыгында 1995-нши йылдан алып ислейди. Ол мунда бас деп специалист исин юриткен. Билимин оьстирер ниетте, Гульфира Мавлимбердиевна Ростов-на-Дону каласындагы Сырт-Кавказ социал-политикалык институтында окыган.
2014-нши йыл Гульфира Капитуллаева орталыктынъ етекшиси этип беркитилген. Сол заманга ол орталыктынъ исининъ йорыгын ийги билген куллыкшы эди. Гульфира Мавлимбердиевна Ногай районындагы КЦСОН боьлигин янъы етекшилеп баслаган йылда, орталык айлак осал аьлде болган. Каныгыслы куллык этуьви мен етекшиси оьз куллыкшылары ман бирге орталыкты тийисли дережеге коьтереди. Бу заманларга «Ногайский район» МО-дагы КЦСОН боьлиги Дагестан Республикасында ийги деген бес Яшавшыларды социаллык яктан канагатлав комплексли орталыкларынынъ сырасына киреди.
– Бу куьнлерде «Ногайский район» МО-дагы КЦСОН боьлигинде 113 куллыкшы аьрекетлейди, олардынъ сырасында – 67 социаллык куллыкшысы. Социаллык куллыкшылар 600-ден артык аьдемди канагатлайдылар. Солардынъ сырасында эсли, сакат аьдемлер бар, солай ок осал аьжетсизленген аьеллердинъ балалары. Канагатлаган аьдемлерди бизим куллыкшылар баьри яктан да коьтергишлемеге шалысадылар. Кол коьмегин эм йылы соьз айтып, тил коьмегин де этедилер. Солай ок материаллык яктан да колдан келген шаклы коьтергишлемеге шалысадылар. Орталыкта аьрекетлеген аьр бир куллыкшы оьзининъ исине уьйкен яваплылык пан карайды. Биз бек коьп разылык соьзлер эситемиз, эслилерден эм бизде канагатланган баска аьдемлерден, олардынъ йылы соьзлерине, разы болувына мен бек суьйинемен. Бир-бирде социаллык куллыкшылары оьз куллыгын кайтип ийги этип этсе де, эслилер сырасында бир кемшилик тапканлар да болады. Сога коьре, мен дайым да оьз куллыкшыларыма шыдамлы эм сабыр болынъыз деген маслагатымды айтаман. Аьр бир куллыкшы уьшин кыйналаман. Ис орынлар саны азаймаса экен, оларга куллык болып турса экен деп тынышсызланаман. Куллыкшылардынъ аьр бирисине исин ийги толтырганы, анълаганы эм коьтергишлегени уьшин юрегимде разылыкты саклайман. Олардынъ аьр бириси уьйкен куллык этеди. Савлай орталыгымыздынъ уьстинликли аьрекетлеви олардынъ аьр бирисининъ исине бойсынады. Сога коьре куллыкшыларымыздынъ баьрисининъ де коьнъилин таппага, ДР Ис министерствосынынъ, «Ногайский район» МР администрациясынынъ, «Ногайский район» МО-дагы КЦСОН боьлигининъ Сый грамоталары ман ислери белгиленсин деп шалысаман.
Куллыкшылардынъ исининъ сапатына, оьзек те, аьр бир организациядагы йылы аьл оьз демевлигин этпей болмайды. Сога коьре мен уьйкен эс этемен КЦСОН боьлигиндеги йылы аьлге, куллыкшылардынъ бир-бириси мен катнасувына.
Бизим боьликтинъ куллыкшылары савлай элимизге кыйынлы болган коронавируслы юкпалы маразынынъ заманында боьтен де куьшли шалысып ислейдилер. Олардынъ коьмегинде керексингенлер де коьп болдылар. Эслилерге олар тек керекли болган дарманлар, азыклар алып элтеп калмай, вакцинациядан тура анълатув хабарласувлар юритедилер, – дейди оьзининъ исининъ акында Гульфира Капитуллаева.
Гульфира Мавлимбердиевна «Ногайский район» МО-да КЦСОН боьлигин етекшилеген йылларда коьп куллык этилинди. Ол КЦСОН боьлигининъ меканларын ярастырув кереги акында ДР Ис министерствосына тилек салган. Янъыларда орталыктынъ меканларынынъ терезелери авыстырылды, бир неше йыл артта кыс мезгилинде меканларды йылытатаган алатлар янъыртылды, электроярыклар янъыдан салынды.
Ийги иси уьшин Гульфира Капитуллаева 2004-нши йыл – ДР Оькиметининъ, 2021-нши йыл ДР Ис министерствосынынъ Сый грамоталары ман савгаланган. «Ногайский район» МР администрациясы да КЦСОН етекшисининъ ийги исин Сый грамоталар ман белгилеген. ДР Ис министри бир неше кере Гульфира Капитуллаевадынъ етекшилиги астында КЦСОН боьлигининъ белсенли аьрекети уьшин «Ногайский район» МР администрациясына разылык йиберген. Гульфира Капитуллаева оьз куллыкшылары эм халк арасында сый-абырай казанган. Оны ман ислегенлерден мен етекшисининъ йогары аьдемшилиги эм ис усталыгы акында коьп эситемен.
Гульфира Мавлимбердиевна бу куьнлерде суьйинишин тек куллыгында тавып калмайды. Онынъ наьсиби – ялгыз кызында эм куьезине-куьез коскан уныгында. Кызы Регина Пятигорск каласындагы лингвистика институтында окыган. Ол – наьсипли ана эм эрининъ ян йолдасы. Бу куьнлерде Сургут каласында яшайды.
Янъыларда Гульфира Капитуллаева оьзининъ 60 йыллык мерекесин белгиледи. Биз ога берк ден савлык, наьсип, куллыгында уьстинликлер, аьр дайым да аьдемлердинъ разы болувы янын йылытып турганын йораймыз.
Н.Кожаева,
РФ Журналистлер союзынынъ агзасы.
Суьвретлерде: Г.Капитуллаева; ис мезгилинде.