Мектеб деген не зат? Бу соравга туьрлише явапламага болады. Биревлерге мектеб – аьдемнинъ яшавынынъ яркын эскеруьвлери, дослык, суьйим, баскаларга – энъ де ийги, анъламлы, суьйикли окытувшылар. Сондайлардынъ бириси – Куьнбатар авыл орта мектебининъ окытувшысы Рабият Кожахмет кызы Боранова. Быйыл ол, окытувшылык тармагында 45 йыл ислеп, тийисли тыншаювга кетти.
Оьз исининъ устасы Рабият Кожахмет кызы балаларга терен билим беретаган эди. Ол Терекли-Мектеб авылында тувып-оьскен. Рабият Кожахмет кызы анасы Айшат Муллаевага, аданаслары Сталинбекке эм Заурбекке разылыгын билдиреди. Терекли-Мектеб авыл орта мектебин битирип, кызалак балалар бавында ислеп баслайды. Сонъында пионер лагеринде вожатый болып ислейди, сол йылларда кыздынъ окытувшы боламан деген ойы беркленди. 1970-нши йылда ол Дагестан патшалык окытувшылык институтынынъ шет эллер тиллери (франко-немец боьлиги) бойынша факультетине туьседи. Институтта окыган йыллары кайдай кызыклы эм мутылмас эди. Окувын битирип, яс специалист Куьнбатар авылына француз тилининъ окытувшысы болып туьседи.
– Мени мектеб директоры Крымхан Тунгатар увылы Шокаев карсы алды. Ол мага келгенде ок, класс етекшиси бол деп маслагат этти. Бираз коркынышлы эди, болса да меним касымда билимли, акыллы, сезгир аьдемлер бар эди – Айшат Динислам кызы Межитова, Фатима Оьтеген кызы Маликова, Зулейха Янибек кызы Межитова, олар мага маслагат берип, соьз коьмегин этетаган эдилер. Мен сондай коллективте ислегениме бактыма бек разыман. Ислеп баслаган биринши куьннен алып, мен, Вайдат Исмаил кызы Янполовадай оьзден, Дина Якуб кызы Казманбетовадай ийги, Зейнап Шатемир кызы Махмудовадай куллыгына мукаят болмага шалысатаган эдим.
Окытувшы. Ол кайдай? Окытувшы – керекли эм кыйынлы кеспилердинъ бириси, сен ийги аьдемди тербияламага, оьз билиминъди саьбийлерге бермеге, тек йогары яваплылык пан ислемеге, оьз исинъе алал аьдем болмага керек боласынъ, – деп эскереди Рабият Боранова.
Хатын оьзин наьсипли деп санайды, быйыл ол эри Имбатали Боранов пан Куьнбатар авылына келип яшаганлы 45 йыл болды, бу авылда балалар да тувдылар, мунда олар канатланып, яшав йолына туьстилер. Уьш бала тербияланды Борановлардынъ аьелинде, олар буьгуьнлерде оьз аьеллерин курып, яшайдылар. Имбатали эм Рабият Борановлардынъ 11 уныклары эм йиенлери, бир немереси бар.
– Мен уьйкен, кызыклы яратувшылык йолымды оьттим. Меним окувшыларым туьрли ерлерде ислейдилер, олардынъ арасында эки юзден артык окытувшылар, медицина куллыкшылары, юристлер, коьлик айдавшылар бар. Олар оьз яшав йолы ман барадылар, аьел курганлар. Аьр бир окувшым акында мен хабарламага боламан, яшавы, куллыгы ман кызыксынаман, – деп хабарлайды окытувшы.
Рабият Кожахмет кызы оьз насихатшыларына, ис йолдасларына, оьз окувшыларына оьз разылыгын билдиреди. Онынъ окувшылары окытувшыда алдыга ымтылыс тувдырадылар, заман ман бирге юрмеге талаплайдылар. Балаларды кызыксындырув уьшин янъы билимлер, янъы йосыклар керек. Коьплеген йыллар Рабият Кожахмет кызы окувшыларды француз тилине, ызгы йылларда англис тилине уьйрететаган эди.
Окытувшыдынъ кесписи алал эм кыйынлы. Саьбийлерге тек билим берип калмай, олар янларынынъ, юрек-лерининъ кесеклерин де савкатлайдылар окувшыларына. Сол да – уллы эм маьнели ис.
Рабият Кожахмет кызы Борановага коьплеген яшав йылларын йораймыз, берк ден савлык, аьелинде наьсип эм онъайлык болсын деп сагынамыз.
М.Саянова,
Куьнбатар авыл орта мектебининъ окытувшысы.
Суьвретте: Р.Боранова.
