Буьгуьнлерде «Шоьл тавысы» республикалык газетасы оьзининъ 90 йыллык мерекесин белгиледи. Сол йыллар ишинде газетадынъ иштелиги де, кеби де туьрленген, редакцияда коьплеген куллыкшылар ислегенлер, олар газетамызды окувшылар суьйип окысын деп коьп куллык эткенлер.
Анварбек Култаев – белгили ногай язувшы, шаир, журналист. Бизим редакциямызга ислемеге аьлиги заманда белгили журналист 1966-ншы йылдынъ шилле айында КПСС РК тапшырувы ман келген. Куллыкка туьсеек алдында яс журналист пан Зубаир Зиней увылы Аджибаев соьйледи. Бас деп Анварбек Утей увылы корреспондент болып, сонъында маданият боьлигининъ етекшиси болып ислеген.
– Мен ислеген йыллар газетадынъ редакторы болып Муса Отаров, Абдулла Юсупов. Муса Отаров акыллы эм билимли эди. Куруптурсын Оразбаев мага коьп коьмек эткен. Муса Отаров мага биринши бетке макалалар язбага тапшыратаган эди. Мен баьтирлер акында да язатаган эдим – Ярыкбай Абдулкадыровтынъ, Сабутовлардынъ, Зекарья Шомаровтынъ, Алимхан Асановтынъ акында, – деп хабарлайды Анварбек Утеевич. Сол заман газета юмада уьш кере шыгатаган эди. Печатник болып Алиш Аджибаев ислеген, туьнде ясалып, эртен шыгатаган эди. Яслар да ислейтаган эди – Климбек Савкатов, Адильхан Янмурзаев, Маркс Етмишев (яткан ерлери ярык болсын). Маркс Етмишевти айырым белгилейди ясуьйкенимиз, айлак талаплы эди деп айтады.
Анварбек Утей увылы Сейдахмет Копуштай увылы Рахмедов эм Алев Атабай увылы Алимов пан бирге ислеген, оларды коьп эм кызыклы язады деп эсине алады.
– Типографияда Разиет Бекмурзаева, Коьшбийке Елакаева ислейтаган эдилер, куллыкларына яваплылык пан карайтаган эдилер, сондай коьп аьдемлер мен ислемеге туьсти мага, – деп шаир эм журналист Анварбек Култаев. Коллектив тыпак эди деп айтады ол, сол да сейир тувыл, кешеси-куьндизи мен редакцияда бирге турганлар сол заманда куллыкшылар. Юмада уьш кере газета шыгарув ол тынышлардан тувыл. Оьзим ислей келе, сол затты ийги этип анълайман.
Анварбек Култаевтинъ ийги журналист болаягына ясуьйкен ис йолдаслары шекленмейтаган эдилер, келеекте ол газетады басшыламага да болаяк эди, болса да яс журналист Махачкала каласына 1974-нши йылда ислемеге кетеди. Республикамыздынъ бас каласында да онынъ журналистикага суьйими артады, сулыбы, билими коьбееди. Ол Махачкалада ногайша тилинде радиоберуьв редакциясын 35 йыл узагында етекшилеген, буьгуьнлерде де радиодынъ оьз хабаршысы болып ислейди. Сыйлы ясуьйкенимиз ислеген йыллары ишинде сый-абырай казанган. Анварбек Култаев – Россия Журналистлер эм Язувшылар союзларынынъ агзасы, Грибоедов атындагы медальдинъ, П.Ершов атындагы халклар ара баргысынынъ иеси. Онынъ аты «Дагестан ГТРК» Алтын китабине киргистилген.
«Шоьл тавысы» республикалык газетасында коьплеген йыллар Азинет Утей кызы Башиева ислейди. Онынъ бу макалада атын айтувымнынъ маьнеси бар. Култаевлердинъ аьелинде так Анварбек-акамыз тувыл, онынъ карындасы да оьз бактысын газета ман байланыстырды. Газетага ислемеге ол 1973-нши йыл келген, сол заманда яс кызалак билген ме экен онынъ савлай яшавы сосы газетада оьтеегин? Бир кесек заман Азинет Култаева Махачкала каласында радиода иследи, сонъында тувган газетамызга кайтып келди. Буьгуьнлерде Азинет Утей кызы «Шоьл тавысы» республикалык газетасында корректор болып ислейди. Мен ислемеге келгенде, мени коршалап алган куллыкшыларынынъ бириси эди ол. Мага ол газетадынъ исининъ сырларын ашты, баспа машинкада да ислеп уьйретти, аьлиги заманда да, оьзим де кеспили журналист болсам да, Азинет Утей кызы ман маслагатласаман.
Газетада Азинет Утей кызынынъ эри Акберди Башиев те иследи, ол фотокорреспондент, коьлик айдавшы куллыгын юритетаган эди. Акберди Ибрагим увылы суьврет алув ниет пен коьплеген ерлерге баратаган эди. Аьлиги заманда ол тийисли тыншаювда.
Исраил Култаев «Шоьллик маягы» район газетасында фотокорреспондент болып ислеген. Ислеген йыллардынъ ишинде ол куллык кайнап турган ерлерге баратаган эди, кой козылав, аслык йыйнав, кыр куллыкларга барып, суьвретлер аькелетаган эди. Сол заман аьптеси Азинет Башиева Нариман авылында яшайтаган эди, Исраил сонда барып, пленкадан суьвретлер шыгарып алган.
Редакцияда Башиевлердинъ увыллары Руслан эм Рустам да туьрли йылларда иследилер. Руслан типографияда коргай иритетаган болып ислеген, Рустам каравылшы болган.
Оьз бактысын суьйикли куллыгына багыслаган инсанлар наьсипли деп ойлайман. Буьгуьнлерде Култаевлер де, Башиевлер де газета ман байланыслы баьри куллыкшылар ман бирге онынъ сыйлы мерекесин белгилейдилер.
Г.Бекмуратова.
Суьвретлерде: А.Култаев, С.Аджиков, А.Алимов; Акберди эм Азинет Башиевлер, И.Култаев эм Б.Копиева.
