Янъыларда Рязань областининъ Касимов каласында ногай халкынынъ данъклы кызы Суьйимбийкеге эстелик ашылды. Бу шатлыклы шарада кала администрация ваькиллери, Татарстан муфтийи Камиль Самигуллин, Россия Муфтийлер Советининъ председатели Равиль Гайнутдин, илми эм маданият программаларды яклав Ш.Марджани атындагы Фондынынъ вице-президенти Мурад Заргишиев ортакшылык эттилер.

Халкымыздынъ уллы кызы Суьйимбийке белгили ногай мырза Юсуфтынъ кызы эм Ногай Ордасынынъ негизшиси Эдигединъ немереси (доьртинши несилде) болган.
Эстеликтинъ ашылувында Татарстаннынъ эм Касимов каласынынъ саниятлар усталары, солай ок бизим «Айланай» фольклор-этнографиялык ансамбли ортакшылык эттилер.
– Биз сондай тарих оьзгерисинде ортакшылаганымыз уьшин бек оьктемсиймиз. Онда биз «Айланай» ансамблининъ негизшиси Сраждин Батыровтынъ туьзген биювлерин коьрсеттик, – деди ансамбльдинъ художестволык етекшиси Альмира Тунгатарова.