Янъыларда Казанда ногай бий Юсуптынъ кызы, Казаннынъ Хан бийкеси Суьйинбийке тувганлы 500 йыллык мерекеси шатлы аьлде уьйкен этилип белгиленди. Онынъ мерекесининъ сыйына, Татарстан Республикасынынъ Илмилер Академиясынынъ тарих институтынынъ уйгынлавы ман, халклар ара конференция озды. Конференциядынъ катнасувшылары Алтын Ордадынъ политикалык яшавында кыскаяклыдынъ орыны, татар халкынынъ тарихлик эсинде эм татар маданиятында Суьйимбийкединъ келпети акында темаларды ортага салып ойласып карадылар.

Конференциядан сонъ Казан филармониясында мерекеге багысланып атаклы артистлердинъ ортакшылык этуьви мен коьрнекли концерт озгарылды.

Институттынъ пресс-аьрекети билдиргенлей, конференциядынъ материаллары «Татар Хан бийкеси Суьйимбийке:тарихлик яшавдан тарихлик эске дейим» деген макалалар йыйынтыгында ярык коьреек. Макалалардынъ бир кесеги «Золотордынское обозрение» деген журналда баспаланаяк.

Келеген йыл Казаннынъ Хан бийкеси Суьйимбийкеге бас каладынъ ортасында эстелик салынмага каралады.

М. КОЖАЕВ.