Аьел, суьйим эм алаллык куьнине багысланып, Терекли-Мектеб авылында орынласкан Тахо-Годи атындагы уьлке танув музейининъ филиалында шара озгарылды. Шара музей, ЗАГС, КЦСОН, район орталык китапхана куллыкшылары ман, Хатын-кызлар совети мен уйгынланган.

Уйгынлавшылар аьелге оьз карасы ман, яшавы ман баскаларга коьрим болып турган аьеллерди шакырдылар шарага. Олар келеяткан несилди аьел аьдетлерин тутып, сол аьдетлерди несилден-несилге коьширип уьйретедилер, соьйтип, аьел байланысларын берк этедилер. Шарага Амзат эм Абидат Искаковлар, Мавлидин эм Сапихан Курпаевлер, Арсланбий эм Любовь Уразаевлер, Залимхан эм Сайрат Адиевлер, Мурзадин эм Марина Саяновлар, Марат эм Феруза Кулунчаковлар шакырылдылар.
Кутлав соьзи мен «село Терекли-Мектеб» СП МО аькимбасы З.Аджибайрамов, Хатын-кызлар советининъ председатели А.Манкаева, ЗАГС етекшиси Т.Суюндикова, Билимлендируьв управлениесининъ куллыкшысы Р.Мустафаева, КЦСОН куллыкшысы Д.Бодениязова шыгып соьйледилер. Келген аьр бир аьел акында шара юритуьвши кызыклы этип хабарлады, олар туьрли соравларга явап бердилер. Йыйылганларга концерт программасы коьрсетилди, оьз йырларын композитор эм йырлавшы Э.Янакаев йырлады, Кадрия атындагы мектебтинъ 7-нши класстынъ окувшысы Камила Киримова эм А.Джанибеков атындагы мектебтинъ 8-нши класстынъ окувшысы Илона Аджекова аьел акында ятлавлар яттан окыдылар.
Аьеллерге район аькимбасынынъ атыннан разылык хатлар тапшырдылар, гуьл байламлар эм эстеликли савгалар бердилер.
Аьел, суьйим эм алаллык куьнине багысланган шара кызыклы болып оьтти.
Бизим хабаршы.
Суьвретте: шара катнасувшылары.