Уьстимиздеги йылдынъ сары тамбыз айынынъ 10-ншы куьнинде Россия Федерациясына бокс спорт кебинде биринши эм сынъар алтын медалин аькелген олимпиада чемпионы Альберт Батыргазиев оьзининъ оьскен эм кеспили спортсмен болып кепленетаган ери – Нижневартовск каласына кайтты. Ол баска аьдемлер мен косылып самолет бортына мингенде, онынъ олар ман бирге уьйине кайтувына бек суьйиндилер эм айлак йылы кепте хош коьрип алдылар.

Сол куьн Нижневартовск каласында олимпиа чемпионы Альберт Батыргазиев эм онынъ тренери болган самолетты коьплеген аьдемлер йолыктылар.
– Меним бу куьнги енъуьвим тек меники тувыл, бу енъуьв бизим баьримизге де ортак болады. Мен бек суьйинемен сизди оьз енъуьвим мен суьйиндиргениме. Эгер мен алдыда 2024-нши йылда болаяк Пекиндеги олимпиадага барсам, Россиядынъ йыйылма командасына кирсем, аьли де уьйкен йигерлик пен элимиздинъ атын, данын якламага шалысаякпан, – деди Альберт Батыргазиев йыйылганлар алдында.
Нижневартовск каласында олимпиада чемпионы Альберт Батыргазиев пен йолыгыслар, онынъ етимисине багысланган шаралар озгарылмага ниетленеди. Оннан сонъ, ол оьзининъ тувган ери Дагестан Республикасына, ата-бабаларынынъ камырлары болган, киндиги кесилген ери Бабаюрт районынынъ Геметюбе авылына келеек. Мунда да оны оьзининъ уллы миллети сагынышлы карайды.