Бала заманда коьплеген инсанлар ятлавлар язадылар. Сол ятлавлар биревлерге уллы яратувшылыкка йол ашадылар, баскалар сол ятлавларды сонъында окыганда, юзлерине йылы куьлемсирев эндириледи.
Суюмбийке Нургишиева (суьвретте) Нариман авыл А.Асанов атындагы орта мектебинде окыйды, ол быйыл 8-нши класска коьшти. Кызалак адабиат, анъ, тарих сабакларын суьеди, ясамага аваслыгы бар. Суюмбийке ятлав язады, ол кишкей янын бийлейтаган сезимлерин ятлав сыдыраларына салады, тоьгеректе болатаган оьзгерислерге маьне берип, олардынъ акында хабарлайды.Суюмбийкединъ «Куьшелегим» деген ятлавын газетамыздынъ бетинде баспалаймыз.

Куьшелегим

Кишкенекей куьшелегим
Азбарымда шабады.
Шешекейде куьпелекке
Завыкланып кабады.

Ол мени мен
Ойнайды.
Оьтпек берсем,
ашайды.

Мойнак, кел деп
Шакырсам,
Коьзлериме карайды.
Торгайлар ман
Дос тутып.

Ысламага ымтылды,
Ушаман деп йыгылды.
Кишкей коьлдинъ ишинде
Шомылам деп ювырды.

Мойнагым деп суьемен,
Алал дос деп билемен.
Дослыгымыз коьп йылларга
Созылар деп сенемен.