Хатын-следователь эр кисилер мен бирге кыянатлык болган ерге барады, шайытларды сорайды, кыянатлыкты ашыкламага деп ыспатлар йыяды. Ер юзинде аьдемликтинъ ярасык кесегине сондай кеспиди сайлавга не зат себеп болады экен. Бу кеспиди сайлаган хатын-кызлар саны Россия Федерациясы бойынша аз болса да, бар.
Халклар ара хатын-кызлар куьнине рас барып, тыныш болмаган кеспиди сайлаган хатын-следователь акында оьз макаламды язбага токтастым. Мен «Шоьл тавысы» республикалык газетадынъ ис коллективине келгениме тезден 18 йыл болады, сол йыллар ишинде коьплеген аьдемлердинъ, Ногай районымыз бойынша болган оьзгерислер акында язбага туьскен. Сол макалаларым ишинде Ногай шоьлде биринши хатын-следователь Фатима Сулейманова (кыз тукымы Аджибаева) акында язбага да туьскен. Аьли архивли газеталарды актарган болсам ша, тувра кайсы йыл язганымды да айтпага болаяк эдим, ама сол озган заманда болган хабар. Аьли биз Фатима Шора кызы Сулеймановадынъ янъы уьстинликлери, етимислери акында соьзимизди бардырамыз.
Фатима Шора кызы Аджибаева Терекли-Мектеб авылынынъ А-Х.Джанибеков атындагы орта мектебин уьстинликли окып битиргеннен сонъ, Кубанский патшалык университетининъ юридический факультетине окымага туьседи. Окув йыллар бек кызыклы эди. Кеспидинъ коьп янъылыкларын, сырын мунда билди Фатима Сулейманова. Сол оны боьтен де даьвлендирди, кесписин дурыс сайлаганына айлак разы болды.
Йогары окув ошагын уьстинликли окып битиргеннен сонъ, Фатима Шора кызынынъ ис аьрекети Ногай районындагы Россия МВД боьлигинде басланды. Фатима Ногай районымызда, йогарыда да айтып оздым, биринши хатын-следователь эди. Ногай районымызда ислеген йыллары да Фатимадынъ босына кетпеди. Ол коьплеген уголовлык иси бойынша куллык эткен эм уьстинликли тамамлаган. Сол заманларда онынъ куллыксуьерлиги, алдына салынган мырадына етип болув касиетин етекшилери айтатаган эди (бу меним алдынгы язган макаламнан).
Терен билими, алдыга бармага ымтылысы бар аьдем бир еринде токтап турмайды. Ол оьрленмеге йоллар излейди. Фатима Шора кызы да тап сондай болып, оьрленуьв, оьсуьв ниет пен Саха Республикасынынъ Ленинск каласына тамада следователь болып, сол заман онынъ майор аты бар эди, Ногай районыннан коьшириледи. Мунда бизим Фатимады йылы йолыктылар, ол баслап, бир йыл узагында МВД-дынъ следственный боьлигининъ етекшисининъ орынбасары болып иследи. Оннан сонъ, сол боьликти бир неше йыл узагында етекшилемеге де туьсти. Ол етекши болып, сол следственный боьлик коьплеген шараларда катнасып, савгалы орынларга етисип турдылар, ис аьрекеттинъ тамамлары да йогары аьлде болган. Фатима Шора кызы кайсы ерде ис аьрекетин бардырса да, дайым куллыгына яваплылык пан карайтаган кыскаяклы.
2022-нши йылдынъ ишинде Фатимады Якутск каласынынъ следственный управлениесине етекшисининъ орынбасары этип коьширгенлер. Сол йылдынъ август айыннан алып, Фатима Шора кызынынъ полковник деген аьскерлик чины да бар.
Хатын аьдем тувыл экеш, бу ис аьрекет эр кисиге де тыныш тувыл. Оьзек те, кыйынлыклар болмай, бир ис аьрекет те юрмейди. Исте баьриси де бир, эр де, хатын да, ама Фатимадынъ ис тамамлары акында эситкенде, ол эр кисилерден артык болмаса, исин кем юритпейтаганын коьремиз. Ол, аьр бир оьзине берилген уголовлык исти, басыннан ызына дейим, орыслар айтканлай, «а» аьриптен «я» аьрипке дейим еткерип толтырады.
Фатима Шора кызы яс заманында алдына салган мыратларына аьли етистим деп ойлайды, ама аьли де алдыда коьп затлар бар.
– Ис аьрекет тыныш тувыл, бизде тыншаюв куьнлер де болмай коятаган заманлар боладылар, болса да, мен сайлаган кеспимди сондай да суьемен эм соны ийги толтырмага да шалысаман. Бу куьнге дейим сол кеспиди сайлаганыма оькинген йокпан, – дейди Фатима Сулейманова.
Алдымызда 8-нши Март –Халклар ара хатын-кызлар, язлык байрамы. Сол куьн бизим куватлы кесегимиз ярасык кесектинъ ваькиллерин кутлайды.
Гуьл байламлар, савкатлар… Ийги соьзлер, байрамлар, баьриси де хатын-кызлар уьшин. Сол куьнди Фатимага да тыншайып, толы коьнъилде йолыкканды йораймыз, а мен болсам, онынъ етимислерин аьли де куьтемен, неге десе терен билимли аьдем акында язув – бизге де уьйкен Сый.
Г.Сагиндикова,
РФ Журналистлер союзынынъ агзасы.
Суьвретте: Ф.Сулейманова.
