Янъыларда Россиядынъ естестволык илмилерининъ академиясы Карашай-Шеркеш Республикасынынъ Халк язувшысы, публицисти, сыйлы Иса Суюнович Капаевти билимди таралтув эм адабиат боьлиги бойынша член-корреспонденти этип сайлаган деген суьйинишли хабары келди.
Буьгуьнлерде Иса Суюнович Капаев ногай эм орыс тиллеринде 40 китаплерининъ авторы болады. Ол 1949- ншы йылда Эркин-Юрт авылында белгили ногай язувшысы Суюн Капаевтинъ аьелинде тувган. Онынъ шыгармалары «Дружба народов», «Знамя», «Дон» эм сондай баска журналларынынъ бетлеринде дуныя ярыгын коьргенлер, китаплери «Современник», «Советский писатель», «Советская Россия», «Молодая гвардия» эм сондай баска Россия баспаларында шыкканлар. Язувшыдынъ кайбир китаплери эм айырым шыгармалары Казахстан, Туркия, Болгария, Украина, Польша эллеринде баспаланып келгенлер. 1980-нши йылдынъ ызында бас каламызда, айтпага, «Есть такие парни», «Сказание о Сынтаслы», «Вокзал», «Гармонистка», «Шел человек по улице» деген хабарлары кирген йыйынтыклары дуныя ярыгын коьрдилер.
Онынъ шыгармалары коьп кере Савлайсоюзлык эм Россия бойынша баспадан шыккан антологияларына киргенлер. Ногай язувшы СССР эм Россия Язувшылар союзынынъ бир неше съездлерининъ делегаты да болып сайланган. 1998-нши йыл ол Карашай- Шеркеш адабиатына эткен уьйкен косымы уьшин У.Алиев атындагы Халклар ара баргысынынъ иеси болган. Онынъ « Уплывающие тени» деген кара соьз шыгармалары кирген йыйынтыгы адабиат ярысында Россия Президентининъ грантына да тийисли этилген. Иса Капаев драматургияда да оьзин сынаган язувшы болады. Онынъ «Ветеран», «Как Мархаба правду нашла» деген пьесалары Москвада баспаланып шыкканлар. Олар халк театрларынынъ сахналарында салынганлар.
90-ншы йылларда Иса Капаев «Половецкая луна» деген адабиат-художестволык эм публицистлик журналын шыгарувда коьп куьшин салган язувшы болады. 1991-нши йылдан 1996-ншы йылга дейим ол сол ок журналдынъ бас редакторы куллыгын етимисли юритип келген. Оны тек Сырт-Кавказда тувыл, Ростов областиндеги, Татарстан, Казахстан, Литвадагы окувшылар да алып окыганлар.
Солай болып, ол «Орысша-ногайша» соьзлигининъ туьзуьвшиси эм авторы да болады. Иса Капаевке Карашай-Шеркеш Республикасынынъ Халк язувшысы, РФ ат казанган маданият аьрекетшиси деген сыйлы атлары берилген.
2016-ншы йыл язувшыдынъ аты «Аьлиги замандагы Россиядынъ тарихшилери» деген энциклопедия соьзлигине киргистилген. Аьлиги заманда белгили язувшы Иса Капаев – Москва каласындагы Россия язувшыларынынъ Адабиат ямагатынынъ Президиумынынъ агзасы.
Белгили ногай язувшымыз Иса Суюнович Капаевти Россиядынъ естестволык илмилерининъ академиясы билимди таралтув эм адабиат боьлиги бойынша член- корреспонденти этип сайлавы ман ак юректен кутлаймыз! Ога берк ден савлыкты, яратувшылыгында йогары бийик етимислерин ак юректен сагынамыз!
Г.Нурдинова.
Суьвретте: Иса Капаев.
