Дагестан Республикасынынъ Аькимбасы Сергей Меликовтынъ 2022-нши йылдынъ 28-нши мартында кабыл этилинип алынган 63-нши номерли Указына коьре, адабиат тармагында етискен уьстинликлери эм коьпйыллык етимисли куллык эткени уьшин шаир, коьшируьвши, публицист, Россия Язувшылар союзынынъ агзасы, Дагестан Республикасынынъ Язувшылар союзынынъ ногай секциясынынъ етекшиси Анварбек Утей увылы Култаев «Дагестан Республикасынынъ Халк шаири» деген сыйлы атка тийисли этилинди.

Бу шатлыклы оьзгерис пен байланыста шаирди «Ногайский район» МР администрациясынынъ аькимбасы Мухтарбий Аджеков кутлады. «Сыйлы Анварбек Утей увылы! ДР Ногай районынынъ етекшилиги Сизди «Дагестаннынъ Халк шаири» деген сыйлы атка тийисли этилингенге ак юректен кутлайды. Шаирлер баьри заманларда да халк бар экенлигин белгилеген. Сиз дайым да буйырык пан тувыл, ак юрегинъизден язгансынъыз, оьз окувшыларынъызды да алдамай. Сизинъ поэзиядынъ бас келпети – Ногай шоьллиги. Туьнегуьнги эм буьгуьнги шоьллигимиз акында уьйкен оьктемлик пен, суьйимлик пен язасыз: аьдемлердинъ арымастай кыйын салувы аркасы ман онынъ туьрленуьви акында.
Сизинъ аьр бир окувшынъыз аьр шыгарманъызда бизим миллет касиет белгилерин табады, яхшылыкты эм яманлыкты айырып оьлшейди, дайымлык баалыкларды белгилейди.
Сизге берк ден савлыкты, узак йыллар бойы яратувшылык аьрекети мен каьрлевди, соны ман байланыста уьйкен куьш-куватлыкты эм алал окувшыларды йораймыз», – деп айтылады район аькимбасынынъ кутлавында.