Оьткен саьли куьн, 26-ншы июльде, Дагестан Аькимбасы Сергей Меликов Махачкала аэропортында Россияда ОАЭ элшиси Мохаммад Ахмад Аль-Джаберди йолыкты.
Регионнынъ туристлик объектлери бойынша экскурсия озгарув ман Сергей Меликов Мохаммад Ахмад Аль-Джаберге Дагестаннынъ бас табиат ярасык ерлерининъ бириси – Сулак каньонын коьрсетти. Ол – Европадынъ энъ терен каньоны эм дуныядагы энъ теренлердинъ бириси. Онынъ узынлыгы – 53 шакырым, а теренлиги 1920 метрлерге етиседи.
Сонъ республика етекшиси эм Россиядагы ОАЭ посолы Каспий тенъизи ягасында орынласкан «Каспий» санаторийинде болдылар. Мунда элши республикадынъ тек туристлик потенциалы ман тувыл, дагестан халк яратувшылыгы ман да танысты: ол – табасаран калшелери, ботлих боьрклери, кизляр пышаклары эм Кайтайгта кол усталары ман тигилген затлар.
Сонъ промышленность эм агропромышленность тармакларындагы предприятиелерде болдылар. Оннан баскалай, ОАЭ элшисине «Айдиев Бийгиши Абсалутдинович» эгинши-фермерлик хозяйство ерин коьрсеттилер. Мунда, 76 га ерден артык майданда бав эгилип, емислер эм юзим оьстириледи.
Олар солай ок «Уйташ» инвестиционлык майданды (132 га ери) карап шыктылар. Мунда буьгуьнге 5 инвестиционлык проектлер яшавга шыгарылады. Олардынъ бириси – «ДагПолимер» кулланувга берилген, а доьртеви ( Стекловолокно Каспий заводы, Гаджиев атындагы завод, «Ириб», «Капитал Инвест-Пром») – яшавга шыгарылув уьстинде. Сонынъ уьшин 1 млрд. маьнеттен артык акша шыгарылган эм 365 ис орынлар туьзилген.
Мохаммад Ахмад Аль-Джаберге Дагестанда салынаяткан энъ уьйкен межигитти коьрсеттилер. Онда бир ок заман 23 мынъга ювык аьдемлер намаз кылмага болаяклар.
Сонъ регион етекшиси эм Россиядагы ОАЭ элшиси Кумторкала районында «Тюбе» индустрияллык парк еринде болдылар, «Керамогранит Дагестана» АО-ды карап шыктылар.
Дагестандагы сисе – Россияда энъ ийги. Соны шайытлайды «Салаватстекло Каспий» ООО предприятиеси. Завод продукциясынынъ халклар ара ISO сертификаты бар, эм ол Азербайджан, Армения, Грузия, Казахстан, Киргизия, Узбекистан ерлерине еткериледи.
Россиядагы ОАЭ элшиси «Салаватстекло Дагестана» предприятиединъ продукциясы ман кызыксынды эм оны ОАЭ майданында коьрсетпеге эп болаягын ортага салып ойласпага маслагат берди.
– Биз Россиядынъ Промышленность эм савда министерствосы ман россиялык фри-зона туьзуьв уьстинде куллык этемиз. Белки, сонынъ ярдамы ман Абу-Даби яде Эмираты ерине продукцияды экспорт кебинде йибермеге амал болар. Биз оьз ягымыздан коьмек этермиз, – деди Россияда ОАЭ элшиси.
Сергей Меликов белгилегенлей, «Север-Юг» халклар ара коьлик коридоры дурыс логистика туьзуьв уьшин амаллар ашар, сонынъ ишинде ОАЭ ман да.
