Бизим элимизде, республикамызда ызгы куьнлерде коронавируслы инфекциясынынъ яйылувы ман байланыслы аьллер яман болып баслады, куьн сайын авырыйтаганлардынъ саны коьбееди. Бизим Ногай районында да аьллер кыйынлы болып туры.

Ногай районынынъ орталык больницасында балалар боьлигининъ негизинде ковид-госпиталь ашылган, мунда тагы да «кызыл зона» ислеп баслады. Янъыларда районда озгарылган Оперштабында «Ногайский район» МР администрациясынынъ аькимбасы ман тыйдажлык этуьв амаллары акында карар алынган, сол амаллар яман мараздынъ токтатувына каратылган. Соны ман байланыста Ногай районынынъ имамлар совети яшавшыларды кавыфсызлык амалларын тутпага керек деп шакырув этеди.
Баьринъизге де тилек саламыз: оьзинъиздинъ тувган-кардашларынъыз, тоьгеректегилеринъиз акында, ясуьйкен несилимизди саклав акында ойланынъыз, олар бу авырувды айлак авыр оьтедилер. Биз сизди аьдем коьп ерлерге барманъыз деп шакырамыз, солардынъ ишинде – дуа беруьв эм баска шаралар. Ямагат ерлерде турганда, маскалар тагынъыз, бир-биринъизден армаган турынъыз.
Аьлиги авыр аьллер болып турганда, мен мусылманларды намазларды уьйинъизде кылынъыз деп шакыраман. Алла-Тааладынъ коьмеги мен авырыганларга тез ийги болганын йорайман.
Роспотребнадзор куллыкшыларынынъ эм врачлардынъ баьри талаплавларын да тутсак, биз аьдеттеги яшавга кайтып келмеге болармыз.
Алиасхаб Танаев,
Ногай районынынъ имамлар советининъ председатели.