Сизди Балаларды коршалав халклар ара куьни мен ак юректен кутлаймыз. Бу аьлемет байрам балаларда яй таркавлар басланатаган йыл шагынынъ биринши куьнинде белгиленеди.
Балалык – аьр аьдемнинъ оьмиринде яркын боякларга эм мыратларга толган аьлемет яшав шагы. Балалар – бизим яшавымыздагы энъ баалы байлык. Биз оларга уьйкен эс каратув ман баьри суьйимимизди беремиз, олар ден савлыклы, наьсипли, уьстинликли эм энъ маьнелиси – оьз соьзине эм исине яваплылык тутып болатаган аьдемлер болып оьсер уьшин колдан келген баьри затты да этемиз. Бизим олар акында каьр шегуьвимиз – келеек куьнге уьлис косув. Олар уьшин биз яшаймыз эм кыйын саламыз, районымызды оьрлендиремиз, келеекке планлар туьземиз. Бу байрам биз, ясуьйкенлер, аьр баладынъ яшавы, савлыгы эм бактысы уьшин – яваплы, эм, олар оьзлерин сенимли коршаланув астында турганын сезип, ийги яшав йолына туьсер уьшин баьри затты этпеге тийисли экенимизди эске салады.
Ногай районында тувган ери атыннан муниципаллык, регионаллык эм савлайроссиялык конкурсларында, ярысларында оьз зейинлигин эм оьнерлерин коьрсетип, йогары сырагыларга эм савгаларга етисетаган балалар коьп. Ямагаттынъ, властьтинъ, аьелдинъ борышы – зейинли балаларды колтыклав, олардынъ оьнерлерин оьрлендируьв, керекли аьрекет пен каьрлевге онълав. Ис аьрекетине коьре, юрек айтувы ман бизим балаларга оьз оьнерлерин оьрлендируьвге ярдамын тийгистетаган, ярасыклыкты коьрип уьйрететаган эм олардынъ анъ-акыл-эдап дуныясын байытатаган баьрисине ак юректен разылык билдиремиз.
Ама балага энъ де баалы – ол берк эм татым аьел. Бир социаллык институт та ата-анадынъ суьйимин, тувган аьелинде онынъ акында каьр шегуьвди эм йылувлыкты берип болмас, тек аьелде энъ ювык эм суьйикли аьдемлер тоьгерегинде бала савлыгы, касиетлиги, эдаплыгы ягыннан кепленеди.
Сыйлы ата-аналар, тербиялавшылар, окытувшылар, насихатшылар эм оьсип келеяткан несил мен куллык этуьвге оьз яшавын багыслаган баьриси де: аявланъыз балаларды, коршаланъыз оларды. Аьр бир бала сиз яктан суьйимликти, йылувлыкты эм каьр шегуьвди сезип яшасын.
Аявлы балалар! Буьгуьн, Балаларды коршалав халклар ара куьнинде, сизди бу аьлемет байрам ман кутлаймыз, сизге онъайлык, наьсип эм суьйиниш, баьри мыратларынъыз толганды йораймыз.
«Ногайский район» МР администрациясынынъ аькимбасы Д.Эсиргепов.
«Ногайский район» МР Депутатлар Йыйынынынъ председатели Р.Байманбетов.