«Владимир Соловьев пан кешлик» деген телеберуьвде Европарламентте Казахстан элининъ яшавшысы Курманакаев деген бирев россия патшалыгына карсы яман соьзлер айткан. Телеберуьвдинъ юритуьвшиси оны ногай миллет барысынынъ ваькили деп айтканга коьре, биз, Россия ногайларынынъ ямагат организациялары, сондай шыгып соьйлевге явап бермеге керекпиз.

«Ногайлар общинасы» региональли ямагат организациясы атыннан мен айтаман, Курманакаев тек оьзининъ ойын билдиреди, ол савлай халктынъ атыннан соьйлеп болмайды, ялгыз аьдем савлай халктынъ атыннан соьйлемеге ыхтыяры йок.
Курманакаевтинъ Россиядынъ тамыр халкларын «босатув» керек эм россия ерлерин боьлмеге керек деген шакырувга биз тийисли явап берип боламыз. Оьз патшалыгымызда биз баьри миллет ыхтыярларымыз бан да пайдаланамыз, халкымыздынъ ямагат организацияларын, маданият автономиялар ашамыз эм регистрациялаймыз, оьзимиздинъ тилимизди, адабиатымызды, маданиятымыз асабалыгымызды сакламага баьри амаллар да бар. Ногайлар – Россиядынъ тамыр халкы эм баска уьйкен эм кишкей этнослары ман бирге Россия Федерациясынынъ коьпмиллетли халкын туьзеди. Биз россия ямагатшылыгына ыхтыярсыз савлай халктынъ атыннан соьйлейтаган айырым аьдемлердинъ соьзлерине ынанманъыз, оларды савлай ногай халкы ман байланыстырманъыз деп шакырув этемиз. Ногай халкынынъ ваькиллери аьр заманда да, Уллы Аталык согысында эм буьгуьнлерде, Россия алдында оьз борышын толтырганлар эм толтырадылар, тувган ерин коршалайдылар эм керек болса, яшавын курманлык этедилер.
Кудай Россия халклары арасында дослыкты эм кардашлыкты сакласын!
Р.Акказиев,
ямагат эм дин аьрекетшиси Сырт-Кавказ федераллык округында РФ мусылманлар дин управлениесининъ председателининъ толы ыхтыярлы ваькили «Казыят» общинасынынъ председатели.