Россияда йыл сайын 8-нши июльде танъ байрам – Аьел, суьйим эм алаллык куьни белгиленеди. Биринши кере бу байрам элимизде, Аьел йылы деп билдирилип, 2008-нши йыл байрамшыланган. Быйыл болса ол Россия Президенти Владимир Путин 2022-нши йылдынъ 28-нши июнинде кол баскан Указына коьре, официаллык статусын алган. Уьстимиздеги йылдан алып Аьел, суьйим эм алаллык куьнин яшавшылар официаллык аьлде белгилеек. Бу, юреклерди йылыткан, байрам элимизде кенъ байрамшыланып, туьрли калаларда эм авылларда шаралар уйгынланды. Коьримли, коьп йыллар тил бирликте яшаган аьеллерге сый эм оьрмет этилинди.

Байрам куьн узак йыллар бир-бирине тирев болып келген, Янполовлардынъ эм Мусауровлардынъ коьп балалы аьеллерине Ногай район аькимбасынынъ ис борышларын толтырувшы Хамидулла Саитов «Суьйим эм алаллык уьшин» медалин тапшырды. Сыйлы конакларды «Ногайский район» МР администрациясында йылы йолыктылар. Оларга деп курылган сыпыра тоьгерегинде Куьнбатар авылыннан Абдулла эм Вайдат Янполовлардынъ эм Червленные Буруны авылыннан Ибрагим эм Альмира Мусауровлардынъ аьеллери оьзлерининъ, балаларынынъ акында хабарладылар, аьел наьсибининъ сырлары ман боьлистилер. Бу куьнлерде Ибрагим эм Альмира Мусауровлардынъ увылы Руслан Украина еринде спецоперацияда катнасады. Онынъ анасы юрек сызлавы эм соны ман бирге коьп йыллар артта атайлары куьрескен нацизм мен куьресип турган аьвлети уьшин оьктемлиги мен боьлисти.
Хамидулла Саитов конакларга юрегининъ туьбиннен йылы йоравлар йорады: «Сизинъ аьеллер ясларга коьрим болып келедилер. Сиздей, бир-бирине суьйим сезими болып, берк аьел курып, бирге узакка созылган наьсипли яшайтаган эр-хатыны ман коьплер куьезленедилер. Сизге берк ден савлык, узак оьмир, ойлар эм сезимлер бирлиги, онъайлык эм уллы аьел наьсиби!».
Н.Кожаева.
Суьвретте: «Суьйим эм алаллык уьшин» медалин тапшырув мезгили.