Ногай районынынъ Кара-Су авыл администрациясында ямагат кенъеси болып оьтти. Кенъесте авыл поселение эсабына киретаган бурынгы ногай авылларынынъ бириси Сылув-Тоьбе авылында авыл куьнин оьткеруьв мен байланыслы уйгынлав соравлары ойласылды.

Шарада авыл администрациясынынъ аькимбасы Янибек Динакаев, Россия «Чернобыль» Союзынынъ Ногай район боьлигининъ председатели Руслан Кунтувганов, авылдынъ алдынгы аькимбасы Оразали Копиев, авыл ясуьйкенлери эм яшавшылары катнастылар.
Йыйыннынъ ортакшылары Сылув-Тоьбе авылында авыл куьнин быйылдынъ 6-ншы майында белгилемеге деген токтас кабыл эттилер. Соны ман байланыста кенъестинъ барысында авыл ерин тазалав эм коьрклендируьв ислерин юритуьв, авыл администрация яшавшыларынынъ субботнигин оьткеруьв, авылга киретаган йолга эстеликли белги салув, байрамга келген конакларды тамакландырув, концерт программасын аьзирлев эм сондай баска соравлар каралды эм тийисли карарлар алынды.
Кенъесте авыл аькимбасы Янибек Динакаев, авыл имамы Солтанмурат Маушев, ис ветераны Енали Копиев, район чернобыльшилер боьлигининъ етекшиси Руслан Кунтувганов эм баскалар оьз ойлары ман боьлистилер.
М.Ханов.