Мине он бес йыллар артып барады бизим мектебти битиретаган балаларымыз Ортак патшалык сынавларды, патшалык пан белгиленген заманда, ерде оьтетаганларына эм белгилер, балларга коьре салынатаганына. Баслапкы йылларда Ортак патшалык сынавлардынъ янъы кеби коьп аьдемлерге ярамайтаган эди (ис аьрекетимизге коьре, коьргенмиз эм эситкенмиз), тек ызгы заманларда ойларын авыстырганлар да аз тувыл.
Ийгиси эм ойдынъ туьрленуьвининъ себеби кайдай? Сол сынавлардынъ тамамларына коьре, бизим кишкей районнынъ выпускниклери орта Россиядынъ алдышы йогары окув ошакларына окувга туьседилер. Кыскаша айтканда, окыган эм билим алган окувшылар етимислерге етиседилер. Тек сол сынавларды оьтуьв окувшыларга енъиллерден тувыл. Сынавды оьтетаган бир окувшыга класстагы окытувшы-организатор да, кабинеттеги видеокамералар да, аз болса, сонынъ аргы ягындагы аьдемлер де карап турадылар. Сол бираз коркыныш тувдырады. Балалардынъ Ортак патшалык сынавларды бергенде, кайдай кыйынлыкларды оьтетаганларын билер ниет пен бираз алдын олардынъ ата-аналарына сынавларды оьтпеге амал берилди.
Оьткен юмадынъ сонъгы куьнинде А-Х. Джанибеков атындагы орта мектебинде савлай Ногай районынынъ авылларыннан выпускниклерининъ ата-аналары (мыратлары болганлар) эсап сабагыннан сынавларды (олардынъ балаларына сондай сынавларды оьтпеге керек) оьттилер. Бу куьн отызга ювык ата-аналар Ортак патшалык сынавлардынъ баьри кезеклерин де оьзлери оьттилер. Сынавлардынъ енъил тувыл экенин, оьзлери оьткеннен сонъ, ата-аналар бек аьруьв анъладылар.
«Ата-аналар уьшин Ортак патшалык сынавлар» деп аталып, Дагестан Республикасы бойынша, сол санда Ногай районында да, оьткен акция басланаяктан алдын, катнаспага суьйгенлердинъ алдында оьзининъ насихат соьзи мен Патшалык сынавлар комиссиясынынъ председатели Алтын Даут кызы Агаспарова, сынавлар юретаган пунктынынъ етекшиси Муслият Нурадил кызы Беккишиева анълатувы ман шыгып соьйледилер. Оннан сонъ олар – буьгуьнги «окувшылар» колларына тек паспортлары ман кара туьс сыялы калемлери мен тийисли йорыкларга коьре, сынавга кирдилер, оннан сонъ да баьри зат та тап сол балалар оьтетаган сынавлардагыдай болды.
Тезден выпускниклерге Ортак патшалык сынавларды оьтпеге туьсеек. Сол сынавлардынъ кайдай экенин билген ата-аналар оьзлерининъ балаларына ийги колтыклав этеегине энди сенемиз.
Г.Сагиндикова.
Суьвретлерде: ата-аналар Ортак патшалык сынавларды оьткен шагында.
