Ызгы занъ. Аьр бир аьдемнинъ яшавында сол куьн бир де мутылмас куьн деп саналады.

Куьнбатар авыл орта мектебтинъ 11-нши классынынъ окувшыларына да аманласув, мунълы эм занъыраган ызгы занъ шалынды. Быйыл мектебти 7 бала битирди. Выпускниклерге яхшы йол соьзин мектеб етекшиси Тамара Сраждин кызы Бариева, Ногай район финанслар боьлигининъ етекшиси Арслан Анварбек увылы Кусегенов, ногай телевидениединъ етекшиси, мектебтинъ выпускниги Даниял Исакаев, окытувшылык исининъ ветеранлары, биринши окытувшылар эм класс етекшилери, ата-аналар атыннан К.Адисова эм М.Шориева айттылар.
Тувган мектеби мен аманласып турган окувшылар окытувшыларына разылык соьзлерин багысладылар. Ызгы занъды шалмага ыхтыяр мектеб выпускниги Акшалы Оразлиевага эм 1-нши классынынъ окувшысы Самира Шерпеевага берилди. Окув йылларынынъ ишинде оьнерин, билимин коьрсеткен балаларга, окувшыларга ийги тербия, билим берген окытувшыларга Сый грамоталар тапшырылды. Коьплеген йыллар мектебте ислеген, аьли болса тийисли тыншаювга шыккан ясуьйкенлеримиз Юмазиет Мулла кызы Кошекбаева, Рабият Кожахмет кызы Боранова, Залимхан Юсуп увылы Аджигельдиев байрамга шакырылдылар, олар уьйкен йолга шыгып турган балаларга насихат соьзлерин айттылар, алдыдагы сынавларды уьстинликли оьткенин йорадылар. Йылы соьзлер 11-нши классынынъ класс етекшиси Рыслыхан Ахмат кызы Эдильбаева да айтты, ол канатланып турган саьбийлерине ашык йоллар йорады.
Ызгы занъ байрамы коьтеринъки коьнъилде оьтти.
Г.Абдулакимова.
Суьвретте: мектебте байрам мезгилинде.